YMCA-in training an buatsaih

Young Men's Christian Association (YMCA), North East India Region chuan nimin aṭang khan ni thum awh tur 'Young Peacemakers Traning Programme' an buatsaih.

YMCA North East Region chairman Dr R Lalthangliana chuan, YMCA chu ṭhalaite nun khalh ngiltu pawimawh a nih thu sawiin, "YMCA hi pawl pawimawh tak a ni a, India leh khawvel hmun hrang hrangah changtlung takin a inzár pharh mek zel. Hmarchhak bial bikah Guwahati khawpuia YMCA-te'n inbenbelna hmun tur kan neih ve theih nan kawng min dappui turin Assam Chief Minister pawh ka dawr tawh a, theihtawp chhuaha nawr zui zel ka tum a, chhànna ṭha tak kan hmuh ngei pawh ka ring," a ti.

Dr R Lalthangliana chuan, khawvela Isua rawn kal chhan chu - remna leh muanna siam turin a nih thu sawiin, "Remna leh muanna a awm chuan Central Jail neih a ngai lo ang a, police duty leh jail tángte an awm a ngai lo ang. Lal Isua thu ken remna leh nuanna hi ṭhalaite'n vawng nung zel ila. Mizoramah hian YMCA member kan pun zel theih nan ṭan lak a pawimawh," a ti a; Mizo ṭhalaite a tam thei ang ber YMCA-ah an inziah luh theih nan ṭan la turin member-te a chah.

Training-ah hian thupui chu, 'Conflict and Peace Culture' tih a ni a, resource person atan pastor Emmanuel, Laymen's Evangelical Fellowship, Shillong hman a ni.