INC Candidate-in lawmthu a sawi kual

Tuirial bial by-election neih zawh taka INC candidate Chalrosanga Ralte, MPCC secretary chuan Thawhlehni leh nimin khan Tuirial biala khaw ṭhenkhat a tlawh kual a; by-election neih zawh tak thlirlêtna neih pahin amah thláwptute hnena lawmthu a sawi.

By-election-a tling zo ta lo zinga mi Chalrosanga Ralte hian October 2, Thawhlehni khan Thingdawl tlawhin, zanah Bualpui a tlawh a; nimin khan Kawnpui leh Hortoki a tlawh leh a, vawiinah Lungdai a tlawh leh ang.

Chalrosanga Ralte chuan, by-election tluang taka neih a ni chu lawmawm a tih thu sawiin, "Tling zo ta lo mah ila, lawmna tur tam tak kan neiin ka hria. Tuirial bial hi ZPM bial ni mek a ni a, MNF sorkar vanglai tak a la nih bawk avangin kan tan a harsa em em a, hniam taka bul ṭanin, theihtawp kan chhuah nã a, kan dinhmunin a la zir ngang lo a ni ber," a ti.

A vote hmuh zat enin, Tuirial bialah Congress party nghet takin a ding reng tih a kan thu sawiin Chalrosanga chuan, "Vote 4,000 dáwn lai kan hmu thei hian kan tlahniam chuang lo tih a lang chiang hle. Kum 2018 inthlan aia vote kan hmu tam zawk kha hmasawnnaah ka ngai," a ti a; amah vote-tute chungah lawmthu a sawi rualin, Tuirial bialah theihtawp a chhuah chhunzawm zel dawn thu a sawi bawk.