TET nei lo lak tawh siamṭha

Mizo Students’ Union (MSU) General Headquarters chuan, Rose Bud English School, Chhipphir headmaster tura lakah thil fel lo a awm nual a, headmaster atana lakin Teacher Eligibility Test (TET) a nei loh thu an tarlang.

MSU chuan, Rose Bud English School headmaster atana personal interview hmachhawn zinga TET nei mi pahnih an awm laiin TET nei lo lak a nih bakah, panel list-ah pawh TET nei pakhat chiah dah a nih thu an tarlang a; chutih rualin, headmaster tura lak tawhin dan anga thiamna neih ngai a neih loh avanga Mizoram sorkarin a siamṭha leh chu lawmawm an tih thu an sawi.

MSU chuan, "Mizoram Education & Human Resources Development Department (School Education) Recruitment Rules 20B-in a phût ang thiamna nei lo chu cancel leh tura sorkar kan ngennain rang taka ngaih pawimawh a hlawh chu lawmawm kan ti a, thil dik lo siamṭhat a ni hi Mizoram sorkar chungah lawmthu kan sawi a ni," an ti a; Rose Bud English School chu sorkar aṭanga puihna dawng, grant-in-aid school a nih thu an tarlang.