KHAWTHLIR

Thisen pe
Aizawl City PYD (UPC NEI) chuan nimin khan Bethlehem Kohhran Hall-ah Aizawl Civil Hospital tan thisen unit 224 an pe a, petute mipa 183 leh hmeichhia 41 an ni. CZ HSS Alumni pawhin nimin khan Kolasib District Hospital Blood Bank-ah thisen pek an huaihawt a, mipa pakua leh hmeichhia pahnihte'n thisen unit 11 an pe. NSS unit hrang hrangte'n nimin khan thisen unit 25 an pe a; Serchhip College NSS-in District Hospital-ah unit 10, Women Polytechnic, Aizawl NSS-in Aizawl Civil Hospital-ah unit 9 leh Leitlangpui Higher Secondary School NSS-in Lunglei Civil Hospital-ah unit 6 an pe a ni.

Thehluh theih
Higher & Technical Education (Technical Wing) chuan National Eligibility-cum-Entrance Test (NEET) kaltlanga Mizoram state quota chan tumte chu dhte.mizoram.gov.in ah dilna form la (download) a, thil pawimawh (document) thil tel ngaite thil telin November 12, 2021 tlai dar 3 thleng HTE (Technical Wing) pisaah thehluh theih a nih thu a tarlang.

Tuitla ruang hmu
November 2, Thawhlehni zan dar 7 vel khan B Vanlalruata (45) h/o Lalrindiki, Lawngtlai Council Veng chu Chhimtuipui lui, Nghaleng lui chhuah bawr velah a tla a, nimin zing dar 7:30 vel khan a ruang hmuh a ni. Thawhlehni zan aṭanga B Vanlalruata ruang zawnnaah Tuipuiferry MTP leh Lawngtlai Council Veng YLA member-te an thawk chhuak a ni.

VC dan sawiho
Village Council inkaihhruaina dan hman lai mekte zir chiang a, paih leh belh ngaite siamrem tura din Lushai Hills District (Village Councils) Act, 1953 Drafting Committee chu nimin khan an chairman Zothanmawia, Local Administration department (LAD) secretary hoin Secretariat conference hall-ah an ṭhukhawm. Lushai Hills District (Village Councils) Act, 1953 chu The Mizoram (Village Councils) Bill, 2021 tia thlâk an rêl a; inkaihhruaina tur an duante chu sorkar pawmpui tura thehluh thuai an tum bawk.