COVID-19: Mizoram dinhmun ; Hripui vei 638 hmuh belh a ni

November 2, Thawh­lehni khan Covid-19 vei mi 638 hmuh chhuah a ni a, swab sample endik aṭangin 10.32% a ni. Nimin khan hripui vei dam tawh mi 301 chhuahtir an ni a, nimin chhun lamah Covid-19 vanga thi an awm lo.

Thawhlehnia hripui vei hmuh tharte chu mipa 296 leh hmeichhia 342 an ni a; ZMC laboratory-a hmuh chhuah 85, TrueNAT hmanga hmuh 38, RAT hmanga hmuh 507 leh Fluorescent Immunoassay (FIA) hmanga hmuh pariat an ni.

IDSP record angin, Mizoramah Covid-19 vei 1,22,992 hmuh chhuah a ni tawh a, mipa 59,758 leh hmeichhia 63,234 an ni, mipa aiin hmeichhia 3,476-in an tam zawk. Nimin tlai dar 5 thleng khan mi 1,16,532 (94.75%) chhuahtir an ni tawh a, mi 436 (0.36%) thi tawhin, enkawl mek mi 6,024 (4.90%) an awm.

November 2, Thawhlehnia hripui vei hmuh chhuah thar mi 638-te chu symptom nei 380 leh nei lo 258 an ni a; tualchhunga kái 633 leh state pawn aṭanga rawn lut panga niin, tualchhunga kai zingah hri an kàina chin hriat loh mi 286 an awm.

Swab sample endik aṭanga Covid-19 positive hmuh zat percentage (positivity rate)-ah Serchhip district sang berin, 30.73% a ni a; positivity rate 10% chung lam district dangte chu - Hnahthial 18.72%, Lunglei 17.70%, Mamit 14.69% leh Champhai 10.24%-te a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,22,992 chu mi 1,000 zelah hripui vei mi 112 an awm ang a ni a; mi 1,00,000 zela Covid-19 vangin mi 39 an thi tawh ang a ni. Nimin khan tlai dar 5 thlengin hripui vei dam tawh mi 301 chhuahtir an ni a; Aizawl district-ah mi 126, Lunglei district-ah 109, Hnahthial district-ah 38, Champhai district-ah 18, Kolasib district-ah pasarih leh Lawngtlai district-ah mi pathum an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Covid-19 positive hmuh tawh 1,22,992 zinga mi 1,18,430 chu Mizoram chhunga kái chhâwng an ni a, mi 4,562 chu Mizoram páwn aṭanga an rawn luh hnua hmuh chhuah an ni.