Sorkar sum dinhmun a ṭha lo RBI aṭangin sorkarin sum a puk

Vanglaini thu dawn danin, state sorkarin a sum dinhmun a ṭhat loh chuan RBI aṭangin a pung awmin sum a pûk thei a; sum pûk theih dan hi chi thum - special drawing facilities (special ways and means tia hriat ṭhin), ways and means leh overdraft-te a ni. Sum pûk theih bituk zat leh a pung tam dan a inang lo

State sorkarin RBI aṭanga sum a pûk dawn chuan, special drawing facilities hmangin a pûk hmasa ber tur a ni a, a pung pawh a tlem ber. Sum pûk chu a rùl thei lo a nih chuan ways and means hmangin a pûk leh thei a, a la rùl thei lo cheu a nih chuan overdraft hmangin a pûk leh thei. Overdraft hnua a rûl thei lo a nih chuan state treasury khâr a ngai tawh ṭhin.

Special drawing facilities leh ways and means hmanga sum pûk hi ni 90 chhunga rulh tur a ni a, overdraft hmanga sum pûk chu ni 21 chhunga rulh tur a ni thung.

Mizoram sorkar chuan special drawing facilities hmangin sum hi a pûk mek a; a pûk chhan chu - sorkar hnathawkte kumin May thla hlawh tur a neih daih tawh loh vang a ni. Cheng vbc. 180 vel thleng pûk theih a nih laiin, Mizoram sorkarin a pûk zat chu vbc. 180 a tling lo.

Vanglaini palai zawhna chhángin Finance department hotute chuan, sorkar laipui aṭanga sum hmuh tura beisei ang hmuh a nih loh avangin special drawing facilities hmangin RBI sum pûk a nih thu an sawi a, "Sorkar laipui 

aṭangin kan hmu chho zel ang a, kan inrùl ve zel thei ang. Chu bakah, sorkar hnathawk hlawhte pûk a ni dawn a, dinhmun a ṭha chho ve zel turah kan ngai," an ti.

Finance department hotute chuan, ways & means hman a ngaih an rin loh thu leh hman a ngai a nih pawhin rei lo te chhung bak hman a ngaih an rin loh thu an sawi.

May 25, 2020 khan Vanglaini palai zawhna chhangin chief minister Zoramthanga chuan, Covid-19 avangin ways & means hmanga sum pûk a la ngaih loh thu a sawi a, "Mahse, central aṭanga sum hmuh a tlem zel chuan pûk a ngaih hun a awm a rinawm," a lo ti tawh a ni.