Lungleia RT-PCR laboratory bun nan Finance-in Rs. 30,00,000 a pe chhuak

YMA Sub-Headquarters, Lunglei kaihhruai páwl hrang hrang hruaitute chuan, Lungleia RT-PCR laboratory din a nih theih nan bungrua leh thil hrang hrang leina atan Finance department-in cheng nuai 30 a pek chhuah thu nimin khan an dawn thu an sawi.

Lunglei Sub-Hqrs YMA leh pawl hrang hrang hruaitute chuan nimin khan Lunglei Press Club-ah thuthar thehdarhtute an kâwm a; YMA Sub-Hqrs vice president K Lalfakzuala chuan, Lungleia RT-PCR laboratory dinna tura mamawh bungrua leh hmanrua leina turin Finance department-in Rs. 30,00,000 niminah a pek chhuah thu an dawng tih a sawi a ni.

K Lalfakzuala chuan, November 2, 2021-a Lunglei Sub-Hqrs YMA President-in sorkar thuneitute a biak lai chuan sum chu Finance department-ah a la tàn thu a sawi.

RT-PCR laboratory bun tura hma an lak meknaah sorkar aṭangin thu lawmawm awm ta lo se, a tàwp an thlen ngam leh ngam loh tur zawhna chhangin K Lalfakzuala chuan, NGO anga an kal a ngaih thu sawiin, "Naktuk Inrinni-ah committee lian zawkin a ngaihtuah leh dawn," a ti.

YMA Sub-Hqrs, Lunglei kaihhruaia Lungleia pawl hrang hrang aiawhte November 2, 2021 zana ṭhukhawm chuan, Lungleia RT-PCR laboratory bun a nih leh nih loh chungchangah tun kar chhung sorkar ngaihchàn a, sorkarin hma a lak loh chuan November 8, 2021-ah Lunglei khawpuiah total bandh huaihawt an lo rel tawh a ni.

September 22, 2021-a an ṭhutkhawmnaah pawh, RT-PCR laboratory chu October 2021 chhung ngeia bun fel turin Mizoram sorkar an lo phût tawh bawk.