India ramah tuialhthei man a tlahniam

Sorkar laipui chuan tuialhthei - petrol leh diesel aṭanga excise duty a lak ṭhin chu a tihiam a, hemi rual hian state hrang hrangte'n tuialhthei man aṭanga chhiah, value added tax (VAT) an lak an tihniam ve nghal. Sorkar laipuiin excise duty a tihhniamna hi petrol-ah Rs. 5 leh diesel-ah Rs. 10 a ni.

Chief minister Zoramthanga chuan nimin khan social media hmangin Mizoram sorkarin petrol leh diesel aṭanga VAT a lak chu Rs. 7-a a tihhniam dawn thu a puang. Hemi hnu hian Taxation department chuan notification chhuahin, nimin aṭangin petrol leh diesel-a VAT lak ṭhin tihhniam a nih thu an tarlang.

Taxation department tarlan danin, VAT lak ṭhin chu petrol-ah 14.5% aṭangin 5.23%-ah tihhniam a ni a, diesel-ah 25% aṭangin 16.36%-ah tihhniam a ni thung.

Sorkar laipuiin excise duty a tihhniam avang leh Mizoram sorkarin VAT a tihhniam hnuah petrol chu litre khatah Rs. 12 vel leh diesel chu litre khatah Rs. 17 velin a tlahniam dawn nia thu dawn a ni.

Vanglaini palai zawhna chhangin Food, Civil Supplies & Consumer Affairs (FCSCA) director Ramdinliani chuan, Taxation department notification chhuah chu Indian Oil Corporation (IOC) Ltd. hnenah an thawn nghal thu a sawi a, "IOC hian Mizoramin VAT a tihhniam milin Mizorama petrol leh diesel man tur an rawn bituk dawn a ni," a ti.

Nimin tlai dar 3:30 vela Vanglaini palaiin a biak lai chuan IOC-in petrol leh diesel man an la bituk thar loh thu sawiin Ramdinliani chuan, "Rawn bituk thuai an tum a, vawiin (Ningani) ngeiah an rawn bituk hman kan beisei," a ti a; sorkar laipuiin excise duty an tihhniam avangin nimin khan petrol leh diesel man a tlakhniam ṭhen nghal tho thu a sawi.