Rev. Rokhuma vuiliam a ni

Mizorama pastor hmasate zinga mi, Synod Moderator hlui Rev. Rokhuma (91), Mission Vengthlang chu November 3, Nilaini zan dar 7:05 khan an inah a thi a, nimin chhun khan an inah thlah a nih hnuah chhun dar 12-ah Mission Vengthlang Presbyterian Kohhran biak-inah Synod moderator Rev. Dr C Lalhlira'n vui.

Rev. Rokhuma hi Synod Inkhawmpui 1987-ah moderator a ni a; Synod puipa mawhphurhna dang - Secretary, Executive Secretary, Finance Officer leh Statistician-te a ni tawh a, Mizoram Synod-ah puipa mawhphurhna chelh kim thei mi tlemtê zinga mi a ni. Kumin October thla khan Covid-19 veiin, State Referral Hospital-ah hun eng emaw chen enkawl a ni a, October 28-ah SRH-ZMC aṭangin a chhuak a ni.