Oil palm tharthawh lo turin Pawlte'n Chief Minister an ngen

Pawl hrang hrang telna Joint Action Committee on Oil Palm, Mizoram (JAC on Oil Palm) chuan November 3, Nilaini khan chief minister Zoramthanga hnenah lehkha thehlutin, Mizoramah oil palm chìn tharthawh a nih loh nan hma la turin an ngen.

JAC on Oil Palm-ah hian Association for Environmental Preservation (ASEP), Biodiversity and Nature Conservation Network (BIOCONE) leh Conservation Mizoram bakah, Wildlife Institute of India-a scientist-C Lallianpuii Kawlni te an tel a ni.

JAC on Oil Palm chuan, an pawl chu Mizorama nungchate leh an chenna hmun humhalh leh venhim ṭulnain a phuar khawm tih tarlangin, sorkar laipuiin National Edible Oil Mission - Oil Palm (NMEO-OP) hmanga hmalakna tharthawh a tum dan leh hmarchhak state hrang hranga hmalaknate chu an duh loh thu, thuchhuah hmangin kumin August leh September thlaahte an puanzar tawh thu an tarlang.

Pawl hrang hrangin oil palm an duh loh thu an puanzar chu ram hmangaihna vang leh Mizorama nungchate leh an chenna humhim duh vang a nih avangin an thlàwp tlat thu tarlangin JAC on Oil Palm chuan, "Kan rama oil palm chìn tharthawh hi kan ram leh a chhunga chengte tan a him lo tih hriain, hetiang hmalakna rêng rêng hi kan rama a thlen loh nan hma min laksak turin kan ngen tak meuh che a ni," an ti.

Chief Minister hnena ngenna an thlenah hian pawl pathuma president leh secretary-te bakah, Dr Lallianpuii Kawlni ten hming an ziak a ni.

JAC on Oil Palm hian thuchhuah an siam nghal bawk a, oil palm chìn an duh loh chhan ber chu - oil palm-in ram leilung a tihchhiat ṭhin avang leh Mizorama nungchate leh an chenna humhim duh vang a nih thu
an tarlang.

Mizoram chu leilung, thing leh mau leh nungchaah a hausa ṭhin tih sawiin JAC chuan, "Thing leh mau, thlai leh ramsa tam tak a awm a, ruahtui a tla ṭha a, ramngaw leh ram hring ṭha a ni a, hengte hi nungchate tan chenna atana hmun ṭha a ni," an ti.

JAC on Oil Palm, Mizoram chuan, oil palm tharthawh leh a ni a, tam tak chìn leh a nih chuan ram leilung nasa takin a ei chhe dawn a, chu chu thing leh mau dangte leh nungchate'n an tuar hle dawn tih tarlangin, "Ecological disaster (thing leh mau leh nungchate tan chhiatna rapthlak) a thleng hial thei dawn a, Mizo nunphung pawhin nasa takin a tuar dawn a ni. Chuvang chuan, oil palm tharthawh leh hi pawm theih a ni lo," an ti bawk.