Covid-19 vei zat 2-in a pung

June 11, Ningania Zoram Medical College (ZMC) Covid-19 Laboratory-a endik tura swab sample lak aṭanga zan thlenga mi 222-te sample endik tawhah Covid-19 hripui vei mi pahnih hmuh chhuah leh a ni a, mi dang 220-te an fihlim thung.

SRH-ZMC Covid-19 Bulletin tarlan danin, hripui vei hmuh thar mi pahnihte hi mipa leh hmeichhia niin, Aizawl district leh Siaha district mite an ni a, Mizoram páwn aṭanga rawn haw ve ve an ni.

State Referral Hospital (SRH)-ah Covid-19 vei mi 36 enkawl mek niin, mipa pasarih leh hmeichhia 29 an ni a, an zinga pahnih chu nimina dah luh thar an ni. SRH-a awm mekte hi kum 14 leh 46 inkar an ni a; Aizawl district mi 20, Kolasib district mi 11, Saitual district mi pathum leh Mamit leh Serchhip district mi pakhat ve ve an ni. Mi dang 67 chu an district ṭheuhah enkawl an ni thung.

SRH-a enkawl mek hripui vei zinga pakhat chu nimin khan ICU-ah dah luh a ni a, ICU-a awm sa nen ICU-a enkawl mek mi pahnih an awm a, ngaihtuahawm an ni lo. Mi dang 34 chu Isolation Ward-ah enkawl an ni a, pakhat­in hawsik a nei a, investigation tih mek a ni. SRH-ah hian hripui vei rinhlelh thilah nimin khan mi pariat dah luh a ni bawk.

ZMC Covid-19 Laboratory-ah hian nimin khan mi eng emaw zatte swab sample laka endik leh a ni a, zan lamah result chhuak tura beisei a ni.