Covid-19 vanga thi tawh zingah Insawiselna nei lo ṭhalai an tel
Health minister Dr R Lalthangliana hoin November 3, Nilaini khan Expert Committee on COVID-19 Management chu Secretariat con-ference hall-ah an ṭhukhawm a, an hmalakna leh hmalak belh ngaihnate an sawiho. Covid-19 vanga thite chu natna benvawn nei an ni vek lo a, insawiselna nei lo ṭhalaite pawh an tel thu tarlan a ni.
Dr R Lalthangliana chuan, Mizorama Covid-19 dinhmunin ziaawm lam a pan hret hreta a lan thu sawiin, "Kan zavaia ṭangruala kan thawhhona rah a ni a, fimkhur chhunzawm zel erawh a pawimawh," a ti.
Chief secretary Dr Renu Sharma chuan, Mizorama Covid-19 lên dan dinhmun chu India ram state dangte aiin a la sang tih a sawi a, "Hei hi ka ngaih pawimawh hmasak ber tur a ni a, ṭha tak leh theihtawp chhuah tlanga kan thawhho ka duh," tiin a sawi.
Prime Minister-in Covid-19 vaccine pek a ngaih pawimawh thu sawiin Renu Sharma chuan, "Target group kan neihte hi kumin Krismas hma hi chuan thleng kim vek turin ṭan kan lak a ngai dawn," a ti. Ṭhutkhawmah hian Covid-19 Medical Operational Team chairman Dr ZR Thiamsanga, MLA leh Health secretary R Lalramnghaka te pawh an tel a ni.
Ṭhutkhawmnaa tarlan ṭhenkhat
1. Covid-19 vanga thite natna benvawn nei an ni vek lo a, ṭhalai insawiselna nei lote pawh an awm avangin fimkhur zel a ngai.
2. Positive hmuh chhuah zat 5% aia hniam a nih hma chuan hripui lêng hi thunun a la ni lo a, mipui inthlahdah rih loh a ngai.
3. Mahnia RAT hmanga in test positive, a tira inzêp leh an nat zual hnua buaipui ngai an awm ṭhin.
4. Mahnia sample test-a positive-te chu medical mite emaw, task force emaw hnenah inhriattir zel ni se.
5. Symptom neite a hma thei ang bera hmuh chhuah a pawimawh, a bikin hritlang leh khawsik neite rang taka test vat tur.
6. Aizawla hmun 19-ah sample endikna Kiosk dah a nih tawh.
7. Hripui vei hmuh chhuah hnua zunthlum, BP sang, adt. nei an ni tih hriat chhuah hnuhnawh an tam avangin mipuite'n mahni hriselna an inchîk uluk lehzual a ngai.
8. Hripui vei tih inhriat chhuah hma a enkawl vat a nih chuan dam chhuah theihna a sang.
9. Hripui vei dam lehte'n a hnu lamah an taksaah harsatna an tâwk nasa a, a ṭul anga doctor ràwn thuai a pawimawh.