KHAWTHLIR

MLA la lut dawn
Tuirial Assembly constituency by-election neih zawh taka thlan tlin MNF candidate K Laldawngliana chu vawiin chawhma dar 10:30 hian Assembly Annexe conference hall-ah MLA atan rinawmna thu tiamtira lakluh a ni dawn.

Thisen pe
Nimin khan KṬP, Tuikhuahtlang Branch chuan an veng YMA Hall-ah thisen pek an huaihawt a, ZMC Blood Bank tan thisen unit 31 pein, petute mipa 26 leh hmeichhia panga an ni a; KṬP, Chawnpui Vengthlang Branch pawhin Synod Hospital tan thisen unit 27 an pe a, petute mipa 24 leh hmeichhia pathum an ni. Baptist Higher Secondary School NSS, Serkawn chuan Christian Hospital tan thisen unit 8 an pe bawk.

Tanpuina hlân
YMA Sub Headquarters, Serchhip chuan nimin khan Théntláng Community Covid Care Centre tan ṭanpuina an pe. Ṭanpuina an pekte chu Rs 5,000, buhfai ip hnih, dailuah ip khat leh tél báwm khat niin, a vaia an senso chu Rs 12,900 a ni a, Sub-Hqrs. YMA assistan secretary K Laltlanmawia'n Thentlang Branch YMA vice president Lalṭhuamliana hnenah a hlan a ni. Chhungkaw 153 awmna Théntlangah hian Covid-19 vei mi 66 hmuh tawh niin 22 chu enkawl mek an ni.

Inrinni bazar
Thakthing Veng Local Council chuan thuchhuah siamin, sorkarin Covid-19 inkaihhruaina a thlahdul tawh avangin November 6, Inrinni aṭangin an venga Inrinni bazar chu a pangngai anga kalpui leh tawh tur a nih thu an puang. Thil zuar tur leh lei turte'n mask vuah ngei tur a nih thu an tarlang bawk.

Chalrosanga'n hlan
Tuirial bial MLA by-election neih zawh taka tling zo ta lo, INC candidate Chalrosanga Ralte chuan nimin khan Tuirial biala Lungdai khua hnenah Lungdai Health Security Society ṭanpuina atan VC president C Lianhmingthanga hnenah Rs. 1,00,000 a hlân. Chalrosanga chuan, by-election-ah khan a tla lo a, a tling zo ta lo zawk niin a sawi.