Tlawva SHP enchhin zo thawkhat Khawl pahnihin kawlphetha an siam thei

Khuangthing leh Thekpui inkara Tlawva lui aṭanga kawlphetha siamna tur, Tlawva Small Hydel Project (SHP)-a kawlphetha megawatt 2.5 ve ve pe chhuak thei khawl pahnihte chu enchhin zawh thawkhat a ni a, kawlphetha siam chhuak theia ngaih a ni tawh a, khawl ṭhenkhat part thlakna tur chah mek a ni.

Tlawva SHP enkawltu Power & Electricity executive engineer Lalṭhasanga chuan Vanglaini palai zawhna chhangin, Tlawva SHP-a khawl pahnihte'n pangngai takin hna an thawh theih tawh thu a sawi a, "Kan ti nung zeuh zeuh tawh a, an thawh tur ang an thawk thei ve ve. Chutihrualin, khawl part ṭhenkhat hi SHP siamtu company mithiamte'n thlak ngai an tih a awm a, chu'ngte chu phaiah kan chah a, tun kar tawp lamah a lo thlen kan beisei," a ti.

SHP chu hawn (commission) theih a nih dawn leh dawn loh zawhna chhangin Lalṭhasanga chuan, "Khawl part lo thleng turte hi an vuaha a ṭhat chuan commission theih chu a ni deuh mai ang, mahse, khawl thil a nih avangin chiang taka sawi lâwk theih a awm lo. Sorkar ruahman dan angin kan kalpui ang," a ti a; fûr ruahtui tam lai a pêl tawh a, tui a tlem tawh avangin khawlte chu an tihnun reng theih loh cháng a awm thu a sawi.

PE department leh contractor inremna angin Tlawva SHP hian chhum lo chat loa darkar 700 chhung megawatt 5 a pek theih hnuah chauh contractor-in sorkarah a hlan ang.

Tlawva SHP hi cheng vbc. 73.40 hmangin Nortech Power Project, Kolkata-in an siam a, kawlphetha megawatt 2.50 siam thei kháwl pahnih vuah a ni a, khawl pahnih hmangin megawatt 5 a siam chhuak thei dawn a ni.