Khaw tihhmasawn dan tur sawiho

Aizawl district Special Central Assistance for Tribal Development kalpui tura din District Planning & Monitoring Committee (DPMC) chu November 3, Nilaini khan an chairman Dr Lalhriatzuali Ralte, bawrhsap hoin DC conference hall-ah an ṭhukhawm.

Special Central Assistance for Tribal Development hnuaiah hian Aizawl district-a khaw 40 chu sorkar kum kal mek aṭanga kum 5 dang lo awm turah hmasawnna hna thawhna atan thlan a ni.

Dr Lalhriatzuali Ralte chuan, scheme a hlawhtinna atan khaw mipui an inlungrual a pawimawh tih sawiin, "Line department-te pawh khaw mipui nen lungrual taka in thawhho a pawimawh a, an mamawh hriatsak chunga ruahmanna ṭha tak siam te, mipuiin an mamawh an hriat theihna turin inzirtirna ṭha tak neih a ṭul," a ti a; scheme tihhlawhtlin a nih thlengin line department-te'n uluk taka an enpui a pawimawh thu a sawi.

Special Central Assistance for Tribal Development hi Ministry of Tribal Affairs scheme a ni a, hemi hnuaiah hian sorkar laipui chuan Mizorama thingtlang khaw thlan bik 344-ah sorkar kum kal mek leh kum 5 dang lo la awm turah hmasawnna hna a thawk dawn a, khaw thlan bikte'n kum khatah hmasawnna hna thawh nan Rs. 20,38,000 an dawng dawn a ni.