Covid-19 vangin 438 thi tawh

Covid-19 vangin nimin khan mi pakhat a thi a, November 3, Nilaini zan khan mi pakhat a thi. Nimin tlai dar 5 thlengin Mizoramah Covid-19 vangin mi 438 an thi tawh.

Covid-19 vei enkawl lai C Hmangaihzuala (71), Thenzawl chu November 3 zan dar 9:45 khan State Referral Hospital-ah a thi. Covid-19 positive a ni tih October 13 khan hmuh chhuah niin, October 19 aṭangin SRH-ZMC-ah enkawl a ni a, natna dang nei tel a ni.

Nimin chhun dar 12:15 khan Tumsanga (86), Serchhip Hmarveng chu hripui vangin Serchhip DCHC-ah a thi. Covid-19 vei a ni tih October 25 khan hmuh chhuah niin, DCHC-ah dah luh nghal a ni a, natna dang nei tel a nih thu sorkar thuchhuakin a tarlang.