MSSC Sports Complex tur thlirho

Sports & Youth Services minister Robert Romawia Royte leh Mizoram State Sport Council (MSSC) hotute chuan nimin khan Republic Venga MSSC Sports Complex an tlawh a, tihchangtlun dan tur an thlirho.

Robert Romawia Royte chuan, Republic Veng MSSC Sports Complex chu veng bil emaw, sport association mal emaw ta bik a nih loh thu sawiin, "Sorkar ta a ni a, veng tin leh sport association tinte lenna a ni," a ti a; ṭha zawka vawn leh enkawl an tum thu a sawi.

MSSC Sports Complex chu MSSC ramah a len loh avangin thlànmual ram dil belh a ni a, thuneitute'n ram mamawh zat an pek theih beisei a nih thu an sawi a; a hma thei ang bera hnathawh ṭan ni se an ti.

Sports Complex-ah hian zana inkhelh theihna tur volleyball court siamna tur ruahman a ni a, cricket leh thalkah (archery) zirna hmun turte an sawiho nghal bakah, futsal ground tura ruahman pawh an enho a ni.

Hmunhma tlawhnaah hian bialtu councillor David Zohmangaiha, MSSC vice president V Lalzawmliana leh secretary John Ṭanpuia, khawtlang hruaitute leh sports association hruaitute pawh an tel.

SYS minister Robert Romawia hian November 3, Nilaini khan Lai Autonomous District Council (LADC)-a executive member (Sports) C Hrangthianga leh Andrew Laltlanzara (Education) te chu LADC-a infiamna hmunhmate tihchangtlun dan tur chungchang a sawipui a; LADC leh Sports department bultumin Lawngtlaiah Lai Cup Football buatsaih an rel.

Robert Romawia chuan, Chawngte P-ah cheng nuai 140 sengin CSC sak ṭan thuai tum a nih thu leh infiamna ruhrel buatsaih nan cheng nuai 100 chuang PMJVK aṭanga ruahman a nih thu te, Lawngtlai College Vengah cheng nuai 3,461.70 senna tur Residential Sports School sak mek a nih thu te, Chawnhu-ah nuai 246 senna tur community centre sak tum a nih thu leh, nuai 5,019.43 senna tur Lawngtlai District Sports Complex atana pawisa 50% hmuh chu Mizoram sorkarin a dawn tawh thute a sawi bawk.