COVID-19: Mizoram dinhmun ; Hripui vei 526 hmuh belh a ni

November 3, Nilaini khan Mizoramah Covid-19 vei mi 526 hmuh chhuah a ni a, hmuh belh tam lamah India ram state leh UT zingah pangana a ni. Nimin khan vei dam tawh mi 536 chhuahtir an ni a, hripui vangin mi pakhat a thi.

Covid-19 vei Nilainia hmuh tharte chu ZMC laboratory-a hmuh chhuah 69, TrueNAT hmanga hmuh 78, RAT hmanga hmuh 367 leh Fluorescent Immunoassay (FIA) hmanga hmuh 12 an ni a; mipa 262 leh hmeichhia 264 an ni.

IDSP record angin, Mizoramah Covid-19 vei 1,23,518 hmuh chhuah a ni tawh a, mipa 60,020 leh hmeichhia 63,498 an ni, mipa aiin hmeichhia 3,478-in an tam zawk. Nimin tlai dar 5 thleng khan mi 1,17,184 (94.87%) chhuahtir an ni tawh a, mi 438 (0.35%) thi tawhin, enkawl mek mi 5,896 (4.78%) an awm.

November 3, Nilainia hripui vei hmuh chhuah thar mi 526-te chu symptom nei 280 leh nei lo 246 an ni a; tualchhunga kái 525 leh state pawn aṭanga rawn lut pakhat niin, tualchhunga kai zingah hri an kàina chin hriat loh mi 276 an awm.

Swab sample endik aṭanga Covid-19 positive hmuh zat percentage (positivity rate)-ah Serchhip district sang leh berin, 27.92% a ni.

Swab sample endik aṭanga Covid-19 positive hmuh zat percentage (positivity rate)-ah Serchhip district sang leh berin, 27.92% a ni. Positivity rate 10% chung lam district dangte chu - Champhai 24.92%, Mamit 10.82% leh Lunglei 10.81-te a ni a; positivity rate 10% aia sanna district hi November 2, 2021 aiin pahnihin a tlem zawk. Hetih lai hian, Kolasib district-ah swab sample endik a ni lo.

Mizorama swab sample endik bikah RT-PCR hmanga endik zat percentage a tlahniam hret hret zel a, Rapid Antigen Test (RAT) hmanga endik zat a pung hret hret thung. November 3, 2021 thlenga swab sample endik tawh 13,30,252 aṭanga RT-PCR hmanga endik zat percentage chu 23.66 a ni a, RAT hmanga endik zat chu 70.42% a tling. Hetih lai hian, sorkar laipui chuan sample endik zawng zawng aṭanga 70% tal RT-PCR hmanga endik turin state leh union territory sorkarte a lo hriattir tawh a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,23,518 chu mi 1,000 zelah hripui vei mi 112 an awm ang a ni a; mi 1,00,000 zela Covid-19 vangin mi 39 an thi tawh ang a ni.
Nimin khan tlai dar 5 thlengin hripui vei dam tawh mi 536 chhuahtir an ni a; Aizawl district-ah mi 436, Lunglei district-ah 38, Champhai district-ah 30, Lawngtlai district-ah 18, Hnahthial district-ah 12 leh Khawzawl district-ah mi pahnih an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Covid-19 positive hmuh tawh 1,23,518 zinga mi 1,18,955 chu Mizoram chhunga kái chhâwng an ni a, mi 4,563 chu Mizoram páwn aṭanga an rawn luh hnua hmuh chhuah an ni.