MNF-in Tuirial biala an tlin an lawm ; MNF President-in sorkar aṭanga beisei ang la hmu lote Pathian ring ngam turin a chah

MNF party chuan nimin khan Vanapa Hall-ah Tuirial bial MLA by-election neih zawh taka an candidate K Laldawngliana tlin an lawm. MNF president Zoramthanga chuan, sorkar aṭanga beiseina la hmu lote chu Pathian ring ngam turin a chah.

MNF President chuan, social media-ah sorkar hotute leh party hotute dem vak an awm ṭhin tih sawiin, "An duha an thlentir a ni bik si lo. Kum thum kan sorkar tawh si sorkar hnathawk awm si lo, contract leh supply ka la hmu lote kan ti. Hemi thlentirtu Pathian rorelna kan chhût tawh lo. Pathianin Zoram tan mamawh tawk min pe ṭhin. A thil tum tihlawhtling turin Pathian i ring ngam ang u," a ti.

Sorkarna an siam hnuah buaina hrang hrang - Covid-19, ráltlân, vawk hri, ram kâng leh ramri buainate a thleng tih sawiin Zoramthanga chuan, "Heng bakah hian kan phurrit mipuiin min hriatpui si lohin Covid-19 avangin January 2020 aṭanga October 2021 thlengin sorkar laipui aṭanga kan hmuh tur cheng vbc. 2,800 vel kan hmu lo," a ti a, Mizoram chhunga an hmuh tur ang hmuh loh zat erawh an la chhût loh thu a sawi.

MNF President chuan, Mizoram budget chu sorkar laipuiin 90% leh state-in 10% a tum ṭhin thu sawiin, "Hetiang central aṭanga kan hmu lo chung hian engtin nge kan ei a, engtin nge hlawh kan la inpek a ngaihna ka hre tawh bik lo. Pathian ṭanpuinain kan kal thei mai mai a ni," a ti.

Pathian thil tum tihhlawhtlin chu MNF hna a nih thu sawiin Zorama chuan, "Thil siam zawng zawng hnena chanchin ṭha hril turin Pathianin MNF hi a chhanhim a ni. Pathian remruatah independent a la thleng lo. India rama chanchin ṭha hril turin Mizoram chu India rama awm rih turin a ruat a ni," a ti a, Pathianin independent rem la ti lo mah se, Mizoram chu inremna hlawhtling leh ṭha tak a pek thu a sawi.

Zoramthanga chuan, Tuirial bialah an party dinhmun a ṭhat loh avangin inthlan an huphurh thu sawiin, "Serchhip bialah kan tla a, ṭan a ngaihzia hriain theihtawp kan chhuah. Eptu party-te pawhin bei nasa min ti ang, offside ham deuh lek lek ngaite an awm. Ṭan lutuk hi chuan offside lek lek ngaih chángte a awm ve ṭhin. Hnehna kan chan avangin Pathian chunga kan lawmthu i sawi ang u," a ti.

MNF senior vice president Tawnluia pawhin thu sawiin, MNF lungphum chu 'Pathian leh kan ram tan' tih a nih thu sawiin, "Keimahni duh dana kal a rem lo a, Pathian rawn chung zela kan kal a ngai. Tun tum by-election-ah khan party tinte kan ṭang em em vek a, ṭhahnem kan ngai tlang vek bawkin ka hria," a ti a; bial lian vak loah hnehna sang tak an chang thei chu lawmawm a tih thu a sawi.

Tawnluia chuan, K Laldawngliana chu Tuirial bial mipui ta a nih thu sawiin, "Amah vote lotute tan pawh an ta vek a ni. Keini chuan kha inthlan kha free and fair election-ah kan ngai. Engkima min kaihruaitu kan President hnenah leh thuthar thehdarhtute chungah pawh lawmthu kan sawi a ni," a ti.

MLA thar K Laldawngliana chuan, Tuirial bial mipui tan nu leh pa a nih tawh thu sawiin, "Kan party mi chauh ni lo, mimal, chhungkua leh khawtlang anga harsatna in neihte chu ka hnenah lo thlen ula, ka theihna zawng zawngin hma ka la ang," a ti a; a bik takin mirethei zawkte leh hmeithaite tan a din tlat tur thu a sawi.