Oil palm sawihona buatsaih a ni ; Agriculture dept.-in oil palm a ṭha an ti

Agriculture depart­ment chuan nimin khan directorate committee room-ah oil palm chung chang sawihona an buat­saih. Agriculture hotute chuan, oil palm chin ṭulna leh ṭhatna an sawi.

Agriculture director Rohmingthanga kaihhruai sawihonaah hian SAMETI director C Lalnithanga chuan, oil palm chuan hmun a heh loh thu sawiin, "Ram àwla chìn maiin, lo vah vah a ngai ve lo. Thlai dang ṭhat theih lohnaah pawh a ṭha thei. Kum 25 chhung loneitute'n kum tin lak luh an neih theih phahna tur thlai a ni," a ti.

SAMETI Director chuan, India chu khawvela tél thar chhuak thei lian pangana a nih thu sawiin, "Mihring kan tam avangin tel la luttu lian ber a ni lawi si. Chuvangin, thar chhuah tam kan ngai," a ti a, oil palm chu tél siamna atana hmanraw ṭha ber a nih thu a sawi.

Oil palm chu ram lum thlai a nih thu sawiin C Lalnithanga chuan, "Tél lam chi thlaiah a aia ṭha a awm lo," a ti a, Mizoramah ruahtui a ṭhat avangin tui pe loin oil palm a awm theih thu a sawi.

SAMETI Director chuan, research awm si loin mi ṭhenkhatin oil palm-in tui a heh lutuk nia an sawi ṭhin thu sawiin, "Buh, fu leh balhlate ai pawhin tui a mamawh tlem daih zawk. Chu bakah, oil palm hi thlai ṭha tak a ni a, boruak chhia hip raltu ṭha tak a ni. Oil palm hmunah boruak tichhe tura thil hal a awm ngai lo," a ti.

Agriculture deputy director R Vanlalchhuanga sawi danin, oil palm chu 12% slope (ram awih dan) aia sanga chin loh tur a nih rualin, chutiang awm lohnaah chuan 12-23% slope-ah chin tur a ni a, duh duhna hmunah chin theih a ni lo. 20 degree aia sangah chuan chin loh tur a ni a, Mizoramah chin theihna hmun a tam lo.

Sawihonaah hian Central YMA, Biodiversity and Nature Conservation Network (BIOCONE), Association for Environment Preservation (ASEP), Conservation Mizoram, All Mizoram Farmers Union, Department of Forestry (MZU) leh Department of Environmental Sciences (MZU) aiawhte sawm an ni.

Hetih lai hian, leilung, ramngaw leh nungchate humhalhna kawnga hma latu pawl - BIOCONE, ASEP leh Conservation Mizoram-te chuan oil palm-in leilung leh thing leh maute a tihchhiat theih avangin Mizoramah oil palm chin tawh loh an duh thu an lo puang tawh a, tharthawh tawh lo turin Chief Minister an lo ngen tawh a ni.