MLA atan K Laldawngliana la lut

Tuirial Assembly constituency by-election neih zawh taka thlan tlin MNF candidate K Laldawngliana chu nimin khan MLA atan Assembly Annexe conference hall-ah rinawmna thu tiamtira lâk luh a ni.

Assembly speaker Lalrinliana Sailo-in K Laldawngliana chu rinawmna thu tiamtirin MLA atan a la lut a; lak luhna inkhawmah hian chief minister Zoramthanga, minister leh MLA-te bakah, K Laldawngliana chhungte an tel.

MLA atan lak luh a nih hnua Vanglaini palai zawhna chhangin K Laldawngliana chuan, "Rinawm taka thawk turin bial mipuite'n min thlang tling tawh a, bial mipuite nen mamawh hmasa tur sawihoin, tihhlawhtling turin theihtawpin ke ka pên ang," a ti.

K Laldawngliana chuan, inthlan dawna a thutiamte tihhlawhtlin ngei a tum thu sawiin, "Ka sawi angin MLA tih theih chin a awm a ni," a ti a; MLA tih theih bakah chuan a kaihhnawih minister leh a ṭul apiangah theihtawp chhuaha a nawr tur thu a sawi a ni.