Mizoramah April - September 2021 chhungin thisen unit 11,770 pek a ni

Sorkar kum kal mek 2021-2022 chhunga kum chanve, April-September 2021 chhungin Mizoramah thisen unit 11,770 pek a ni a, chu'ng zinga unit 10,288 chu pek bik nei loa a thlawna pek (voluntary donation) niin, 87.41% a ni.

Mizoram State AIDS Control Society (MSACS)-in a chhinchhiah danin, April-September 2021, thla ruk chhung khan Mizorama blood bank 11-a thisen unit 11,770 pek zinga 5,097 (43.30%) chu Model Blood Bank, Civil Hospital, Aizawl tana pek niin, thisen dawng tam ber an ni a, thisen dawng tlem ber Mamit District Hospital-ah unit 229 pek a ni thung.

A thlawna thisen pek, voluntary donation percentage-ah district dangte'n hma an sawn a, Siaha leh Lawngtlai district hospital tih loh blood bank dang zawngah 90% a tling a; Aizawl khawpui chhunga blood bank pahnihah voluntary donation percentage erawh a tlahniam.

Voluntary donation sanna ber chu ZMC niin, 99.36% a tling a, a dawttu Lunglei Civil Hospital-ah 99.99% a ni. Hetih lai hian, Synod Hospital chu voluntary donation hniamna ber niin, 65.70% chiah a ni a, Lawngtlai District Hospital-in dawtin, 71.24% a ni. Aizawl Civil Hospital-ah 88.15% chiah a ni bawk.

Kum chanve chhungin Mizoram pumah blood donation camp ṭum 188 neih a ni a, chu'ngah chuan thisen unit 5,648 pek a ni. Aizawl Civil Hospital-in donation camp nei tam berin, vawi 50 an nei hman a, donation camp nei tlem ber ZMC Blood Bank-in ṭum sarih chiah an nei thung.

Association for Voluntary Blood Donation hruaitute chuan, Covid-19 lang nasa leh vei, inkharkhip leh ṭhalaite'n Covid vaccine an lak hun lai a nih avangtein thisen pek kawnga harsatna tâwk tam tak an awm thu an sawi a, "Duh huna thisen pe thei lo leh donation camp neih duh huna buatsaih thei lo mimal leh pawl eng emaw zat an awm niin a lang," an ti a; Covid-19 vei tan negative aṭanga ni 14 hnu leh Covid vaccine lak aṭanga ni 14 hnuah thisen pek theih a nih thu an sawi.