Aizawla air balloon Thlawhtir sawi dun

Center for Energy Research pro-chancellor & director Dr Prahlada Ramarao chuan nimin khan Aizawl mayor Lalrinenga Sailo chu a pisaah a kâwm a, Aizawl leh a chhehvela awlsam zawka inkalpawh theihna tura air balloon hman chungchang a sawipui. Mayor chuan, air balloon chungchang chu zir chian ṭha a tih thu a lo hrilh.

Dr Prahlada Ramarao chuan, India hmarchhak state-te chu tlang ram, inkalpawhna kawngpui, rél kawng leh airport siam hautakna hmun a nih thu sawiin, "Man tláwm leh him zawk, khualzinte híp thei tur ni bawk leh environment tan pawha pawi lo tur air balloon hmanga inkalpawhna hi Mizoram tan a ṭangkai hle dawn a ni," a ti a; air balloon kalpui dan tur concept paper an buaipui mek chu an zawh veleh AMC Mayor hnenah an thehluh tur thu a sawi.

Mayor Lalrinenga Sailo chuan, air balloon chungchang chu zir chian ṭha a tih thu sawiin, "Ṭha taka hman theih a nih chuan inkalpawhna atana hun rei tak hman ṭhinte pawh a tihziaawm theih ka beisei. Tourism hmasawnna turin sorkarin hma a la a, Aizawl khawpui hnaihah tourist-te hîp thei tur siam belh a ṭul a ni," a ti.