KHAWTHLIR

Champhai dist-ah Inkhawmah zai phal
Champhai district magistrate Maria CT Zuali chuan inkhawmnaa zai chungchangah nimin khan Champhai district-a hman tur inkaihhruaina a tichhuak a, "Inkhawmnaa zai chungchang chu tualchhung kohhranin ṭha a tih angin an kalpui thei ang. Inkhawmah zai remtih a nih chuan fimkhur tak leh ṭha taka hmai tuam chungin kalpui tur a ni," a ti.

Thisen pe
Nimin khan Modern Higher Secondary School NSS chuan an sikulah thisen pek an huaihawt a, Aizawl Civil Hospital tan thisen unit 28 an pe a, petute mipa 22 leh hmeichhia paruk an ni. KṬP, Bethlehem Venglai North Branch pawhin nimin khan Aizawl Civil Hospital tan an kohhran hall-ah thisen unit 21 an pe a, petute mipa 18 leh hmeichhia pathum an ni.

75 Cycle Rally
India independence vawi 75-na lawmna, Azadi Ka Amrit Mahotsav puala Art & Culture department leh Mizoram Cycling Asscociation-te'n Azadi Ka Amrit Mahotsav India @75 Cycle Rally an buatsaih chu nimin zing khan Vanapa Hall kawtah chief secretary Renu Sharma-i'n a vailiam. Rally-ah hian mi 75 an tel a, Vanapa Hall aṭangin hmâr lamah tlânin, Chanmari-Ramhlun-Bawgkawn-Ṭhuampui-Falkland-Chite leh Mualpuite an tlan tlang hnuah Silai Muala Zampuimanga lungphun bulah an tàwp a ni.

Ruihhlo zirho
Mamit District Legal Services Authority chuan nimin khan Mamita IPR conference hall-ah damdawi hman sual laka fihlim theihna tura inzirtirna, 'Awareness campaign on eradication of drug menace' an buatsaih a, Police leh Excise & Narcotics department mi te, advocate, Joint VC, YMA Sub-Hqrs, MHIP leh MUP aiawhte an tel.

Quarters hawng
Rural Development minister Lalruatkima chuan nimin khan Serchhipah Rs. 3,72,82,000 sénga chhungkaw 12 luah theih tura ruahman RD staff quarters building panga leh Serchhip RD Block-in kum 60 a tlinna hriatrengna lungphun a hawng.