Lunglei district-a hman turin Zodintluanga'n ambulance a pe

Thorang bialtu MLA Zodin­tluanga, Congress Legislature Party (CLP) leader chuan nimin khan Lunglei DC V Lalsangliana hnenah Covid-19 donaa hman turin ambulance a hlàn a; Lunglei khawpuia task force pakua hnenah community quarantine centre-a hman turin invenna hmanraw hrang hrang a pe bawk.

Lunglei DC conference hall-a thilpek hlanna inkhawmah Zodin­tluanga chuan, Covid-19 kan do hneh theihna turin mipuiin sorkar thu leh khawtlang hruaitute thu an awih a ngai tih sawiin, "Thu kan awih hi kan ram kan hnam damna tur a ni. Sorkarin dan an duan hi kan zawm a, dikna leh rinawmna vawng chungin kan do hi hneh i tum ang u," a ti.

Zodintluanga chuan, sorkarin hripui vangin theihtawp a chhuah tih sawiin, "Ṭanpuina nasa tak a pe chungin duty-te an hah em em.  Frontline duty-te in hah a, in thawk rim em em tih kan hria a, kan chhuang che u. Vawiina kan do hi a result tur tu mahin kan hre lo a ni," a ti a; task force, sorkar hnathawk, medical staff, force mi leh mi dangte inpekna ropui a tih thu a sawi.

CLP Leader chuan, state páwna hnathawk leh zirlai lo hawte dawnsawn thiam a pawimawh tih sawiin, "Phaiah rilru hah takin lockdown an lo tuar ve tawh a, Mizoram ngeiah an lo thleng a, rei tak kan lo khung leh a ni. Hri an kai dawn nge dawn lo ti rêng rêngin hun an hmang a, nervous breakdown-te an neih a hlauhawm a, panic stage-ah pawh an awm thei ang. Hei vang hian lo dawnsawn thiam a ngai," a ti.

Zodintluanga chuan, a thilpek chu a tàwpna a nih dawn loh thu sawiin, "Lunglei district-in min mamawh chuan engtik lai mahin kan tlanchhe lo ang. Kan medical lama mithiamte pawhin min hrilhfiah zel turin ka ngen a che u," a ti a; a ṭul ang zela hmalak a tum thu a sawi.