DMR Minister-in directorate a tlawh

Disaster Management & Rehabilitation (DMR) minister Lalchamliana chuan nimin khan DMR directorate a tlawh a, DMR buatsaih Mizoram State Disaster Management Plan 2021 leh Kolasib District Harzard Vulnerability Analysis lehkhabu a tlangzarh.

Lalchamliana chuan, DMR department-a thawkte chu tlemte ni mah se, inlungrual taka thawk zel turin a fuih a, "Mahni deh chhuah leh thawh chhuah ni lo leh mahni hlawh ni lote chu i it lo ang u," a ti a; ram leh hnam siamna kawnga tih loh tur an tih leh tih loh inngaihtuaha inzawt fo turin a chah.

DMR Minister hian State Emergency Operation Centre hnathawh dan leh vanduaina rapthlak a thlen thulha DMR-in chhanchhuahna hmanrua a neihte a enpui nghal.

Mizoram State Disaster Management Plan hi kum 2007-a siam ṭan niin, National Disaster Management Authority-in inkaihhruaina a siam anga siam a ni a; chhiatrupna thlen thulha Mizoram sorkar hmalak dan tur leh department hrang hrang thawhho dan turte tarlan a ni.

Kolasib District Hazard Risk Vulnerability Analysis-ah chuan district-in khuarel chhiatna a tawh theih te, hmunhma leh ṭul dang, khuarel chhiatna a thlena hman ṭangkai theihte tarlan a ni. Aizawl, Siaha leh Lawngtlai district tan Hazard Risk Vulnerability Analysis siam a ni tawh a, district dang tan siam tura hmalak mek a ni bawk.