Lungleiah RT-PCR laboratory sawiho ; MLA pek RT-PCR makeshift lab-ah hman tum

Nimin khan Lunglei district High Powered Committee (HPC) pisa conference hall-ah Lungleia RT-PCR laboratory din tum chungchang sawiho a ni a, sorkar official-te bakah tlawmngai pawl hrang hrang aiawhte an tel. Lawmawma Tochhawng, MLA chuan, MLA Zodintluanga Ralte-in RT-PCR kháwl a pek chu makeshift laboratory siam mekah hman a nih tur thu a sawi.

Lunglei HPC vice chairman Lawmawma Tochhawng chuan, Zotlang Tourist Lodge building-a RT-PCR laboratory ruahman mek leh Covid-19 donaa sorkar hmalakna leh hmachhawpte sawiho tura inko khawm an nih thu a sawi a ni.

NHM mission director Dr Eric Zomawia chuan, sorkar laipui aṭanga ‘India COVID-19 Emergency Response & Health System Preparedness Package: Phase-II' (ECRP-II package) kaltlangin Lungleia RT-PCR lab. mamawh bungrua leh thil dangte leina atan cheng nuai 30 dawn a nih thu a sawi a; bungruate chu Government e-Marketplace (GeM) portal hmangin online bidding kaltlanga lei a nih tur thu sawiin, hmalakna kal mekte a sawifiah.

Dr Eric Zomawia chuan, RT-PCR laboratory-a thawk turte pawh ZMC-ah training thuai tura ruahman a nih thu a sawi a; Covid-19 thawh hnihnaah naupang zingah hripui vei an tam thu leh naupangah Covid-19 avangin natna khirh Multisystem inflammatory syndrome in children (MIS-C) thleng thei a nih avangin hripui laka naupang ven him sorkarin a ngai pawimawh nia sawiin, Lunglei Civil Hospital-ah Pediatric ICU ruahman mek a nih thu a sawi bawk.

Lunglei Civil Hospital-a medical superintendent Dr SR Ngurchamliana chuan, Tourist Lodge building-a RT-PCR lab. bun turin September 20-ah hna thawh ṭan a ni a, civil work chu October thla tâwpah zawh a nih thu leh, November 3-ah Planning & Programme Implementation department hotute'n an enfiah thu a sawi.

Dr SR Ngurchamliana chuan, Lunglei DCHC (SIRD Pukpui) chu Lunglei Civil Hospital-a sawn thuai tum a nih thu leh khum 12 awmna ICU tur ruahman mek a nih thu a sawi bawk.

Lungleia Joint NGO Coordination Committee chairman Lalrotluanga, Lunglei YMA Sub-Hqrs president ni bawk chuan, Lunglei district leh chhim lam district dang mipuiin RT-PCR lab. an mamawh tawh tak zet tih sawiin, MLA-te leh Health department hotute chu a rang thei ang bera bawhzui nghal tur leh thawktute training pawh ruahman vat turin a ngen.

Ṭhutkhawmah hian Lunglei South bialtu MLA Dr K Pachhunga, Lunglei district CMO Dr LC Liana leh Health department-a thawktu dang te, Lunglei YMA Sub-Hqrs, Chhimbial Chhantu, Lunglei MJA leh MSU hruaitute an tel a ni.