Covid-19 vangin mi 444 thi tawh

Covid-19 vangin nimin khan mi pali an thi a, November 4, Ningani zan khan mi pahnih an thi tawh bawk. Nimin tlai dar 5 thlengin Mizoramah Covid-19 vangin mi 444 an thi tawh.

November 4, Ningani tlai dar 5 khan Lalremsiama (49), ITI Veng chu State Refferal Hospital-ah a thi a, Covid-19 vei a ni tih October 20 khan hmuh chhuah niin, SRH-ah dah luh nghal a ni. Ningani zan dar 8:10 khan Lalhriatkima (62), Zemabawk pawh SRH-ah a thi a, hripui vei a ni tih October 17 khan hmuh niin, October 18-ah SRH-ah dah luh a ni. An pahnih hian natna dang nei ve ve an nih thu sorkar thuchhuakin a tarlang.

Nimin zing dar 7:15 khan Robin (50), Lawipu chu SRH-ZMC-ah a thi a, Covid-19 vei a ni tih October 12 khan hmuh chhuah niin, October 20 aṭangin SRH-ah enkawl a ni a, natna dang nei tel a ni. C Lalmuana (83), Lunglei Rahsi Veng pawh nimin zing dar 8:30 khan Observation Home CCC, Pukpuiah a thi a, hripui vei a ni tih October 28 khan hmuh niin, CCC-ah dah luh nghal a ni a, natna dang a neih thu tarlan a ni lo.

Tlangmawii (56), Chawnpui chu nimin chawhma dar 10 khan SRH-ah a thi a, hripui vei a ni tih October 16-ah hmuh niin, October 19 aṭangin SRH-ah enkawl a ni a, natna dang a neih thu tarlan a ni lo. R Thangliana (84), Luangmual, Aizawl pawh chawhnu dar 3:45 khan SRH-ah a thi a, Covid-19 positive a ni tih October 18 khan hmuh chhuah niin, a tuk October 19-ah SRH-ah dah luh a ni a, natna dang nei tel a ni.