COVID-19: Mizoram dinhmun ; Hripui vei 508 hmuh belh a ni

November 4, Ningani khan Mizoramah Covid-19 vei mi 508 hmuh chhuah a ni. Nimin khan hripui vei dam tawh mi 412 chhuahtir an ni a, hripui vangin mi pali an thi.

Covid-19 vei hmuh tharte chu ZMC labo­ratory-a hmuh chhuah mi 65, TrueNAT hmanga hmuh 30, RAT hmanga hmuh 401 leh Fluorescent Immunoassay (FIA) hmanga hmuh mi 12 an ni a; mipa 220 leh hmeichhia 288 an ni.

IDSP record angin, Mizoramah Covid-19 vei 1,24,026 hmuh chhuah a ni tawh a, mipa 60,240 leh hmeichhia 63,786 an ni, mipa aiin hmeichhia 3,546-in an tam zawk. Nimin tlai dar 5 thleng khan mi 1,17,857 (95.03%) chhuahtir an ni tawh a, mi 444 (0.36%) thi tawhin, enkawl mek mi 5,725 (4.61%) an awm.

November 4-a hripui vei hmuh chhuah thar mi 508-te chu symptom nei 371 leh nei lo 137 an ni a; tualchhunga kái 506 leh state pawn aṭanga rawn lut pahnih niin, tualchhunga kai zingah hri an kàina chin hriat loh mi 253 an awm.

November 4, Ningania swab sample endik aṭanga Covid-19 positive hmuh zat percentage (positivity rate)-ah Hnahthial district sang berin, 48.00% a ni a; chutih laiin, Siaha district-ah swab sample endik a ni lo.
Positivity rate 10% chung lam district pasarih a awm a, chungte chu Hnahthial district bakah, Mamit district 18.23%, Champhai 17.73%, Aizawl 15.39%, Serchhip 13.02%, Khawzawl 10.96% leh Lunglei district 10.00% a ni.

Mizorama swab sample endik bikah RT-PCR hmanga endik zat percentage a tlahniam hret hret zel a, Rapid Antigen Test (RAT) hmanga endik zat a pung hret hret thung. November 4, 2021 thlenga swab sample endik tawh 13,33,262 aṭanga RT-PCR hmanga endik zat percentage chu 23.64 a ni a, RAT hmanga endik zat chu 70.44% a tling. Hetih lai hian, sorkar laipui chuan sample endik zawng zawng aṭanga 70% tal RT-PCR hmanga endik turin state leh union territory sorkarte a lo hriattir tawh a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,24,026 chu mi 1,000 zelah hripui vei mi 113 an awm ang a ni a; mi 1,00,000 zela Covid-19 vangin mi 40 an thi tawh ang a ni. Nimin khan tlai dar 5 thlengin hripui vei dam tawh mi 412 chhuahtir an ni a; Aizawl district-ah mi 196, Champhai district-ah 80, Mamit district-ah 58, Siaha district-ah 25, Lawngtlai leh Hnahthial district-ah 20, Khawzawl district-ah pasarih, Saitual district-ah panga leh Kolasib district-ah mi pakhat an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Covid-19 positive hmuh tawh 1,24,026 zinga mi 1,19,461 chu Mizoram chhunga kái chhâwng an ni a, mi 4,565 chu Mizoram páwn aṭanga an rawn luh hnua hmuh chhuah an ni.