Chennai aṭanga hawte RAT-a endik leh an ni
Chennai aṭanga rél hmanga mi 800 chuang rawn hawte chu rapid antibody test (RAT) hmanga endik leh vek a ni dawn a; Aizawl district-a mite chu nimin aṭang khan endik ṭan a ni.
District-a chief medical officer-te'n order an chhuah danin, Chennai aṭanga rawn hawte chu an rawn thlen hlimah RAT hmanga endik vek an ni a, non-reactive (negative) vek an ni. Mahse, ṭhenawm state hnaivaiah Chennai aṭanga haw zingah Covid-19 vei an awm nual avangin Chennai aṭanga rawn hawte chu RAT hmanga endik leh vek tur a ni. RAT-a reactive-te chu RTPCR hmanga endik leh a ni ang.
Vanglaini palai zawhna chhangin doctor-te chuan, Chennai aṭanga rawn hawte chu an rawn haw aṭangin ni 29 a nih tawh avangin RAT-a an reactive loh a, hripui vei lan chhuah dan anga an awm loh bawk chuan him tâwk tura ngaih an ni tawh a ni.