Mizoramah solar power plant Kilowatt 939 bun zawh a ni tawh

Zoram Energy Develop­ment Agency (ZEDA) chuan kum hnih chhungin solar power plant, kawlphetha kilowatt 939 pe chhuak thei an bun zo.

ZEDA hotute sawi danin, kum 2019-2021 chhungin Mizoram hmun hrang hrangah nizung chakna hmanga kawlphetha siam chhuahna, solar power plant an din a, chungte chuan kawlphetha kilowatt 939 an pe chhuak thei a ni. Solar power plant an bunte chu 90% subsidy-in an bunsak ṭhin. Solar power plant bun hna chu contractor-te'n an thawk a, a en zuina chu ZEDA kutah a awm.

Kum 2019-2021 chhung vêkin sorkar laipuiin solar street light 20,000 a rawn pe a, 15,000 bun tawhin, 5,000 chu Covid-19 léng avanga an bun theih loh avangin an pe kîr leh thung.

Solar street light 15,000 an bun zinga 6,000 chu Aizawl Municipal Corporation huam chhunga bun a ni a; Tuipuiral tlangdunga lirnghing tuarte tan eng emaw zat an bun bakah, Mizorama chhungkaw 262 in chungah solar khawl an bun bawk.

ZEDA-in solar power plant an siam pakhat, Tlungvel Solar Plant chu December 2019-ah hna thawh ṭan niin, December 4, 2020-ah hawn a ni a, cheng vbc. 14 man a ni.