GAWSS Phase-III zo dawn hnai tawh

SIPMIU, Aizawl chuan 'Augmentation of Water Supply and Construction of 37 MLD (million litres per day - ni khatah tui litre maktaduai 37) Water Treatment Plant for Aizawl Phase-III' (Water Supply Phase-III tia sawi) an siam zo dawn hnai tawh a, harsatna awmte chinfel a ni tawh.

Vanglaini thu dawn danin, SIPMIU hian tui pipe phûm hna an zo ṭêp tawh a, metre 73 vel phûm hmabak an la nei. Hmun hnihah pipe phûmna hmabak bul hnaia chêngte'n pipe phûm an duh lo a, chuvang chuan hun eng emaw chen hna thawh theih a ni lo.

Pipe phûm duh lotute chu UDPA changtu deputy chief minister Tawnluia hoa kawm an nih hnuah pipe phûm hna hi thawh theih a ni a, zawh ṭêp tawh a ni.

Water Treatment Plant for Aizawl Phase-III hi Aizawl khawpui hmar lam zawng chàwmtir tum a ni a, GAWSS Phase-I (10 MLD) leh Phase-II (24 MLD)-te'n Aizawl chhim lam an châwm thung ang. Phase-III pipe-in Laipuitlang a zawm nghal tawh dawn avangin Tuikhuahtlang aṭanga Phase I & II châwm tur vengte pawh huamtir tel dan ngaihtuah a ni bawk.

SIPMIU leh Wadia Techno Engineer Services-in Aizawla chêng zat leh an tui mamawh zat tur project siama an chhût dan chuan, kum 2018-ah khan Aizawlah mi 3,39,992 an awm a, ni tina tui mamawh zat chu ni khatah litre maktaduai 54.63 (litre nuai 546.3) a ni. Chutih laiin, GAWSS Phase I&II-in ni khatah tui litre maktaduai 34.8 an pe thei a, litre maktaduai 19.83-in mipui mamawh a phuhru zo lo.

Kum 2033-ah Aizawlah mi 4,45,131 awm turah ngaih a ni a, tui mamawh zat chu 71.22 MLD ni tura chhût niin, Phase I, II & III-te'n ni khata tui an pek theih zat chu 71.8 MLD a ni ang. Kum 2048-ah Aizawlah mi 5,57,543 awm tur leh ni tin tui 88.92 MLD mamawh tura chhût a ni bawk.

Water Treatment Plant for Aizawl Phase-III siamna tur lungphùm hi March 17, 2018 khan khatih laia UDPA minister Zodintluanga chuan Tanhrila Mualkhang ramah a phûm a; senso tura ruahman chu cheng vbc. 156.67 a ni.