Hmeithai leh rethei tan theihtawpin ke ka pên dawn - Tuirial Bialtu MLA

MNF Tuirial East leh West Block chuan November 6, Inrinni khan Tuirial bial MLA by-election-a an chak lawmna hun Lungdai leh Kawnpuiah an buatsaih a; MLA atana thlan thar K Laldawngliana chuan, hmeithai leh retheite tan theihtawpin ke a pên dawn thu a sawi.

K Laldawngliana chuan, mihring theihna bakah Pathian malsawmna a dawn thu sawiin, "MNF chu Pathian leh kan ram tan tih thuthlung neitu a nih angin mal min sawm a, MNF party anga thawhhona ṭha leh inlungrualna ṭha hi a la awm ngai lo hialin ka hria. MNF chu hnam party a nih angin Mizo takin thil kan ti ṭhin," a ti.

MIZOFED chairman a nih laiin MNF sorkar hmasa a hrawn thu leh a hnuah Congress sorkar kum 10 a hrawn leh thu sawiin K Laldawngliana chuan, "MNF leh Congress sorkar zia chu ka hre chiang ve viau. MNF sorkar chu hna thawk tak tak an ni," a ti a; MNF party mi leh sa a ni chu vannei a intih thu a sawi.

Tuirial Bialtu MLA chuan, Tuirial bialah Pathianin rawngbawl turin a ko nia sawiin, "Kawng lakah Pathianin min phatsan lo ang tih ka ring. Intilal tura thlan ka ni lo a, hna thawk tura thlan ka ni," a ti.