Congress-in ráltlânte an ṭanpui
Congress party zirlai pawl NSUI (Mizoram)-in Myanmar ráltlânte ṭanpuina tura Congress party hminga vehbûr an khawnte chu November 6, Inrinni khan Congress Bhavan-ah Myanmar Refugee Relief Committee (MRRC) hnenah hlan a ni.
Ṭanpuina hlanna inkhawm hi NSUI (Mizoram) president RB Lalmalsawma'n a kaihruai a; ṭanpuina hlantu Congress MLA Lalrindika Ralte chuan, "Hetiang hun hman hi thil duhawm lo ni mah se, kan thil tawn tawh a nih avangin luang chhuak thei zawka kan ṭang hi a lawmawmin a vanneihthlak a, kan innghahna hi mihringah ni loin, Pathianah ni se ka duh," a ti.
Lalrindika Ralte chuan, mahni hmasial leh mi dik lote'n dinhmun ṭha leh ram hruai hna an thawhna ram nuam a nih a rin ngai loh thu sawiin, "Ram vanduai tak an nih ka ring a ni," a ti a; thuneihna thlâkhlelh avang leh mahni hmasialna avanga mahni mihringpuite'n tuar mahse pawi ti lo khawpa thuneihna thlahlel an la awm chu vanduaithlak a tih thu a sawi.
MRRC president Vanlalchhana pawhin thu sawiin, "Myanmar boruak a chhiat a, Mizoram pan an ngaih hnu khan NGO for Myanmar din a ni a, Aizawl district chauh a huam avangin MRRC hi din a ni. A petu leh dawngtute inkara leiah kan lo ṭang ve a ni. Congress party hian he laia Mizote mai ni lo, ram dang danga Mizote an hmangaihzia hretu kan ni a, kan thlamuanpui tak zet a ni," a ti.
Ráltlânte ṭanpuina atan hian NSUI (Mizoram) chuan MRRC hnenah hian buhfai ip 30, thawmhnaw eng emaw zat, damdawi lam hmanrua Rs 30,000 man, pawisa fai Rs 20,000 leh bungraw phurhna tur motor hmanna tur Rs 30,000 an pe a ni.