Lungleiah SVEEP Bike Rally buatsaih

Systematic Voters’ Edu­ca­tion and Electoral Parti­cipation (SVEEP) hnuaiah November 6, Inrinni khan Lungleiah Bike Rally buatsaih a ni a, chief electoral officer (CEO) P Jawahar-a'n a vailiam.

P Jawahar chuan, demo­cracy hrisel tak neih nan khua leh tui vote nei thei chinte chu electoral roll-a ziah luh vek a ngai tih a sawi a, "A hun a thlena vote kan thlak a pawimawh. Kum tling tharte leh roll-a hming la chuang lote chu Special Summary Revision of Electoral Rolls, 2022 -ah inziak lut ngei ang che u," a ti.

Bike Rally-ah hian Royal Knights Bullet Club, Lunglei member-te telin, Lunglei DC pisa kawt aṭangin Pukpui Kàwmzawl thleng an tlân a, electoral roll-a inziah luh pawimawhna leh inziah luh dante aurinna hmangin an puang.

Lunglei district-ah hian SVEEP hnuaiah awareness campaign hrang hrang - video clip, rally, student awareness, social media campaign-te buatsaih mek a ni bawk.

Special Summary Revision of Electoral Rolls, 2022 kal mek chu November 1-30, 2021 chhunga neih tur a ni a, January 1, 2022-a kum 18 tling turte inziah luh theih a ni. Inziah luh, insawn leh siamṭhat dilna chu bialtu booth level officer-te kaltlangin emaw, Voter Helpline App hmangin emaw dil theih a ni.