Covid-19 vanga chhungkaw harsa 50,000 chhawmdawlna tur ruahman a ni - Dr Thangtea

Commerce & Industries minister Dr R Lalthangliana chuan November 6, Inrinni khan State Bank of India (SBI), Luangmual Branch a hawng. Minister chuan, Covid-19 hripui vanga harsatna tâwk chhungkua 50,000 chhawmdawlna tur ruahmanna siam a nih thu a sawi.

Dr R Lalthangliana chuan, Mizoramin Covid-19 a hmachhawnnaah SBI-in nasa taka hna an thawh thu a sawi a; sorkar pawhin Covid-19 vanga harsatna tâwk chhungkuate chhawmdawlna tur an ngaihtuah thu sawiin, "Sorkar laipuiah kan bawhzui dawn a, he ruahmanna hnuaiah hian chhungkaw 50,000 tal tuam kan tum," a ti.

SBI Luangmual Branch chu Aizawl tlak lama cheng mipui tan a hlut dawn thu sawiin R Lalthangliana chuan, "Mipuite'n ṭangkai takin an chhawr dawn a ni," a ti a; SBI chu Mizoramah a tam thei ang bera inzár pharh tura a duh thu leh a ṭul angin Mizoram sorkarin theihtawp a chhuahpui theih thu a sawi bawk.

SBI regional manager LP Lalchangkima chuan, bank chu mipui ta a nih thu sawiin, "Mipuite service ṭha tak pe turin ṭan kan la sauh sauh a, harsatna leh lungawi lohna nei kan awm chuan Regional Office-ah pawh telephone hmangin engtik lai pawhin a thlen theih a ni," a ti.

LP Lalchangkima sawi danin, SBI chuan Mizoram Economic Revival Plan an duang a, a bul ṭan nan vawk vulh lama tuite tan vawk loan an pe. Thingtlang khaw tin tuam chhuah an tum a, khawpuiah pawh hmunhma nei ṭha tan vawk loan an pe thei a ni.

SBI, Luangmual Branch hi Mizorama SBI branch 46-na a ni a, Luangmual Chhangurkâwnah a awm a ni.