Myanmar ráltlân chhinchhiah zat inang lo

Myanmar Refugee Relief Committee tarlan danin, Mizoramah Myanmar aṭanga ráltlân mi 13,583 an lut tawh a, tun dinhmunah mi 1,000 - 2,500 inkar vel Mizoramah an la awm meka ngaih a ni. Hnahthial DC office chhinchhiah danin, Hnahthial district-ah ringawt pawh mi 2,096 an awm mek anga tarlan a ni thung a, chhinchhiah zat a inang lo nia hriat a ni.

Congress party-in November 6, Inrinnia Myanmar ráltlânte ṭanpuina tur Myanmar Refugee Relief Committee (MRRC) hnena an hlannaa MRRC tarlan danin, kumin February 1-a Myanmar sipaite'n thuneihna an hnehchhuh hnuah Mizoramah ráltlân mi 13,583 an lut tawh angin an chhinchhiah a; chu'ng zinga mi 1,000 - 2,500 chu Mizoramah an la awm mek anga tarlan a ni.

Hetih lai hian, Hnahthial DC Office-in a chhinchhiah danin, November 6 khan an district-a ráltlân zinga pathum, Tarpho-a awmte chu Myanmar lamah an lêt a; Tun dinhmunah Hnahthial district-ah Myanmar ráltlân mi 2,096 an awm mek a, an zingah chhungkaw 407 an tel.