Mizo Ṭawng Ruaipui buatsaih a ni

Mizoram Board of School Education (MBSE) chuan November 5, Zirtawpni zan khan 'Mizo Ṭawng Ruaipui' an buatsaih a, Human Resources Development (HRD) board vice chairman L Thangmawia, MLA-in a hmanpui. He hunah hian Mizoram bakah, USA leh Australia-a awm Mizote'n thu an sawi.

L Thangmawia MLA chuan, Mizo ṭawng hmasawnna tura MBSE hnathawhte ropui a tih thu sawiin, "Ṭawng hian culture leh history-te nen inlaichinna thûk tak a neih avangin Mizoram University pawhin uluk zawka zir chianna a kalpui a ṭul. Kan ṭawng leh culture-te Lusei centric-a kalpui a tam a, ṭawng bungrua tihhausak nan Lusei ṭawnga awm lo Zo fa hnam péng dang ṭawnga awmte Mizo ṭawnga seng luh thiam a ṭhat ka ring. Sikul leh college-ah Mizo customary law zir tel a ṭul bawk," a ti.

Mizo Language Board (MLB) din tura Mizo­ram sorkar hmalakna sawiin L Thangmawia chuan, "August 13, 2019-a chief minister Pu Zoramthanga'n HRD Board meeting min neihpuinaah MLB din tura hma la turin HRD Board chu mawhphurhna min pe a ni," a ti a; kum 2022-a budget session-ah MLB Bill put luh hman an beisei thu a sawi.

MBSE chairman JH Zoremthanga chuan, MBSE-in Mizo Language Committee-te dina Mizo ṭawng chungchanga hma an lak dante a sawi a; MZU-a associate professor Dr Zoramdinthara kai­hruai­in Prof. RL Than­mawia, Rozama Chawng­thu, H Ronghaka leh Lalnunhluna ten thupui thlan bik an sawi. USA aṭangin Lalchhanhima Mizo leh Australia aṭangin Joseph L Bawitlung ten an awmna rama Mizo ṭawng dinhmun an sawi bawk.