Covid-19 vangin mi 448 thi tawh

November 5 tlai dar 5 aṭanga nimin tlai dar 5 tlai thleng khan Covid-19 vangin mi pali an thi. Nimin tlai dar 5 thlengin Mizoramah Covid-19 vangin mi 448 an thi tawh.

Doliana (69), Theiva, Siaha district chu November 5 zan dar 10 khan Covid-19 vangin an inah a thi a; a thih hma lawk, November 5-ah vêk Covid-19 vei a ni tih finfiah a ni. November 5 zan vek dar 10:30-ah Lalthlana (75), Chawlhhmun, Aizawl chu hripui vangin SRH-ah a thi a, Covid-19 positive a ni tih October 17-ah hmuh chhuah niin, SRH-ah enkawl nghal a ni.

November 6, Inrinni zing dar 5:20 khan Sangkima (68), Chaltlang chu Covid-19 vangin SRH-ah a thi a; October 23 khan hripui vei a ni tih hmuh chhuah niin, SRH-ZMC-ah dah luh nghal a ni tih sorkar thuchhuakin a tarlang.

Thomas Vanlalruata (88), Kulikawn pawh nimin chhun dar 1 khan Covid-19 vangin SRH-ZMC-ah a thi a; Covid-19 positive a ni tih October 21 khan hmuh chhuah niin, October 22 aṭangin SRH-ah enkawl a ni.

Covid-19 vanga thi mi palite hi natna dang nei tel vek an ni.