Hmarchhak state-a hripui vei tawh tamna ber dawttu Mizoram

Mizoramah Covid-19 vei November 5, Zirtawpni leh November 6, Inrinni khan mi mi 966 hmuh a ni a; Mizoram chu hmarchhak state zinga hripui vei tawh tamna ber dawttu a ni.

November 5 tlai dar 5 aṭanga nimin tlai dar 5 tlai thleng khan hripui vangin mi pali an thi a, Inrinni leh nimin khan mi 1,046 an chhuak. IDSP record angin, Mizoramah Covid-19 vei 1,24,992 hmuh chhuah a ni tawh a, mipa 60,652 leh hmeichhia 64,340 an ni.

Hmarchhaka hri vei hmuh chhuah tawh tamna ber chu Assam niin 6,12,134 hmuh chhuah an ni tawh a; mi 6,02,729 chhuahtir an ni tawh. Nimin tlai dar 5 thleng khan mi 1,19,096 (95.28%) chhuahtir an ni tawh a, mi 448 (0.36%) thi tawhin, enkawl mek mi 5,448 (4.36%) an awm.

Covid-19 vei November 5-a hmuh chhuahte chu ZMC laboratory-a hmuh 77, TrueNAT hmanga hmuh 34, RAT hmanga hmuh 401 leh FIA hmanga hmuh pakhat an ni a, mipa 211 leh hmeichhia 302 an ni.

November 6-a hmuh chhuah mi 453-te chu ZMC-a hmuh 96, TrueNAT hmanga hmuh 49, RAT hmanga hmuh 305 leh FIA hmanga hmuh pathum an ni a, mipa 201 leh hmeichhia 252 an ni.

November 5 khan sample endik aṭanga hripui vei hmuh zat (positivity rate) 10% chung lam district panga a awm a; chu'ngte chu - Serchhip district 21.61%, Champhai 17.65%, Lunglei 15.29%, Siaha 13.49% leh Lawngtlai 12.33% a ni.

Inrinni khan Covid-19 positivity rate 10% chung lam district pakua a awm a, Serchhip district 25.64%, Hnahthial 21.35%, Lawngtlai 20.51%, Lunglei 14.12%, Champhai 12.35%, Khawzawl 11.67%, Aizawl 11.27% leh Mamit 10.00% a ni. Siaha district-ah sample endik a ni lo.

November 6, 2021 thlenga swab sample endik tawh 13,33,262 aṭanga RT-PCR hmanga endik zat percentage chu 23.64 a ni a, RAT hmanga endik zat chu 70.44% a tling. Hetih lai hian, sorkar laipui chuan sample endik zawng zawng aṭanga 70% tal RT-PCR hmanga endik turin state leh union territory sorkarte a lo hriattir tawh a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,24,992 chu mi 1,000 zelah hripui vei mi 114 an awm ang a ni a; mi 1,00,000 zela Covid-19 vangin mi 40 an thi tawh ang a ni.

Nimin khan tlai dar 5 thlengin hripui vei dam tawh mi 531 chhuahtir an ni a; Aizawl district-ah mi 326, Champhai district-ah 56, Hnahthial district-ah 38, Lunglei leh Mamit district-ah 32 ve ve, Siaha district-ah 25, Saitual leh Khawzawl district-ah pasarih ve ve, Kolasib district-ah panga leh Lawngtlai district-ah pathum an chhuak. Inrinni khan mi 515 an chhuak bawk.