Covid vaccine dose 12,22,111 pe tawh

Integrated Disease Surveillance Programme (IDSP) tarlan danin, January 16, 2021 aṭanga November 6, Inrinni thleng khan Mizoramah Covid-19 laka invenna damdawi vaccine dose 12,22,111 pek a ni tawh.

November 6, Inrinni khan Mizoramah Covid-19 laka invenna damdawi (vaccine) dose 94 pek chhuah a ni a, mi 44 hnenah dose khatna leh mi 50 hnenah full dose pek a ni.

Kumin January 16 aṭanga November 6 thleng khan Mizoram sorkarin hmun a ruahman aṭangin vaccine dose 12,17,950 pek a ni tawh a, dose khatna 6,96,831 leh full dose 5,21,119 a ni. Private facility-te'n dose khatna 2,154 leh full dose 2,007 an pe tawh bawk.

Private facility aṭangin Inrinni thleng khan vaccine dose 4,161 pek a ni tawh a, Aizawl East, Aizawl West leh Serchhip district-ahte pek ṭhin a ni.

Health department-in district a ṭhen danin, sorkar hmun ruahmanna aṭanga vaccine dose khatna pek zatah Aizawl East district chu pe chhuak tam ber a ni a, dose 1,80,680 an pe tawh. Pahnihna Aizawl West district-in dose 1,24,458 leh pathumna Lunglei district-in dose 94,849 an pe tawh.

Covid-19 vaccine la tawh hlawm ṭhen hrang hrang zingah dose khatna la zat aṭanga chhûta full dose la hnem ber chu kum 60 chung lam an ni a, kum 60 chung lamah dose khatna 64,474 pek tawh niin, chu'ng zinga 62,364 (96.72%) chuan full dose an la tawh a ni.

May 17, 2021-a vaccine pek ṭan kum 18-44 inkarte chu vaccine dose khatna la zat aṭanga chhûtin full dose la tlem ber an ni a, dose khatna la tawh 4,18,547 aṭangin full dose 2,75,684 (65.86%) chauh pek a la ni.