KHAWTHLIR

Thisen pe
November 6, Inrinni khan KṬP, Tuivamit Branch chuan an kohhran hall-ah Aizawl Civil Hospital tan thisen unit 32 an pe a, petute mipa 25 leh hmeichhia pasarih an ni a; KṬP, Zotlang Branch pawhin Synod Hospital tan an kohhran hall-ah thisen unit 30 an pe a, petute mipa 22 leh hmeichhia pariat an ni. Inrinni vek khan SAY, Serchhip area-te'n District Hospital-ah thisen unit 24 an pe a, petute mipa 16 leh hmeichhia pariat an ni a; Mamit College NSS volunteer-te pawhin Mamit District Hospital-ah thisen unit 22 an pe a, petute mipa 15 leh hmeichhia pasarih an ni.

BJP-in pe
BJP, Mizoram Pradesh chuan Inrinni khan Reiek Branch YMA hnenah oxygen concentrator, oxymeter leh health & hygiene kit an pe. Ṭanpuina hlantu BJP president Vanlalhmuaka chuan, Union Health Minister hnenah Mizoramin RT-PCR khawl a mamawh dan an thlen thu sawiin, "Mizoram sorkar chuan hma lain, RT-PCR khawl pawh min rawn pek belh a, mahse, an la function tir lo niin a lang a, a pawi hle," a ti.

YMA-in hna enfiah
Vantawng Group YMA hnuaia Vigilance and Monitoring Committee leh Thenzawl Joint YMA hruaitute chuan tun hnai khan Thenzawl Vengthara PHE department-in Thenzawl mipui tlan tur tui lâkna hna an thawh meka contractor-ten tuizém lian pahnih an siam mek a hmunah an enfiah. YMA hruaitute chuan, contractor-te chu Thenzawl mipui tana hna pawimawh tak an thawk tih inhria a, a ṭha thei ang bera thawk tur leh hmanrua ṭha thei ang ber hmang turin an ngen.

Hmalakna thlirho
Khawzawl district bawrhsap CC Lalchhuangkima kaihhruaiin November 5, Zirtawpni khan DC conference hall-ah DAY-NULM City Executive Committee chu an ṭhu a, hmalaknate an thlirho. Ṭhutkhawma tarlan danin, Khawzawlah DAY-NULM hnuaiah self help group 17 din a ni tawh a, skill training hrang hrangah mi 120 training tir a ni tawh.