Micro Start Up hnuaia mi 35 puih nan cheng nuai 70 chuang sem a ni tawh

Mizoram sorkar policy, New Economic Development Policy (NEDP) hmangin Mizoram sorkar chuan Micro Start Up hnuaiah mi 35 puihna atan cheng nuai 70 chuang a sem tawh. Sorkar kum kal mek, 2018-19 chhunga NEDP hnuaia Entrepreneurship Development Scheme (EDS) atan cheng nuai 500 dah a ni.

NEDP hmanga mahnia eizawnna kawng daptute puihna EDS hnuaiah programme hrang hrang a awm leh a, chung zinga pakhat chu Micro Start Up a ni. Hei hi Phase I leh II-ah ṭhen a ni a, Phase-I ah cheng nuai 63 chuang sem tawh niin, Phase-II ah hian mi 20 hnenah cheng nuai 15 vel sem a ni tawh bawk. Phase-II hi kalpui mek a nih avangin ṭanpuina pek zawh a la ni lo.

Planning department hotute sawi danin, scheme hi kum 2016-17 ah kalpui ṭan a ni a, a scheme pumpui hmingah, EDS - Promotion of Enterpreneurship and Support for Start Up Business tih a ni. Kum 2016-17 atan hian cheng nuai 200 dah a ni a, kum 2017-18 atan nuai 500 dah niin, kum kal lai 2018-19 chhung atan nuai 500 bawk dah leh a ni.

Planning hotute chuan, NEDP hnuaia scheme an kalpuite chu industry awm tawh sa ni lo, eizawnna kawng thar bik hmanga hma latute puihna leh dinchhuah tum tak takte chauh puihna a nih thu leh, ṭanpui tura an thlante chu inremna fel tak an siampui vek thu an sawi. Ṭanpuina pek tura thlante zingah sum hmanna tura an sawi anga hmang leh si lo emaw, thil dang atana hmang an awm chuan sorkarah an pawisa dawnte rulh lêt leh vek ngai turin inremnaah ziah a nih thu an sawi bawk.

NEDP aṭanga industry thar dintute puihna hi mi pakhat tan Rs. 5,00,000 thleng pek theih a ni a, chutih rualin, dinhmun leh mamawh zat azirin pek zat erawh a inang vek lo thung. Micro Start Up paltlang ngai, industry neitute chu first instalment-ah 40% an pe phawt a, an hmalak dan leh sum hman dante enfiah leh vek hnuah utilisation certificate (UC) an thehluhtir a, chumi hnuah second instalment an pe leh chauh ṭhin.

Planning hotute chuan, a ti tak tak leh hlawhtlin tumte chauh ṭanpuina an pek chhunzawm avangin first instalment pek tawh zingah second instalment pek chhunzawm tawh lohte pawh an awm tih an sawi a; first instalment sum pek aṭanga thla thum chhungin hna an thawk ṭan ngei tur a nih thu leh, sum an pekte chu hmanraw mamawh ṭhenkhat leina tur leh puihna chauh a nih thu an sawi bawk.

Micro Start Up Phase-II ah hian mi 20 hnenah Rs. 5,00,000 thleng pek tura ruahman a nih rualin, endikna chi hrang hrang an paltlang loh chuan Rs. 5,00,000 thleng an dawng thei chuang lo. Rs. 3,00,000 vel leh Rs. 4,00,000 vel dawng turte pawh an awm. Phase-II hnuaia industry 20-te tan Rs. 95,52,500 ruahman chhin a ni a, 40% an pe chhuak tawh a; Phase-II hi ruahman anga a vaia an pek kim chuan, Phase-I hnuaia an pek tawh nen Rs. 1,59,25,600 an pe chhuak dawn a ni.

Micro Start Up Phase-I paltlang mi 15 zinga mi 11 chuan Agri-Business Solution an thlang a; chu chu agriculture lam kaihnawih thil chi hrang hrang a ni. Mi 11 zinga pasarih chuan Rs. 5,00,000 an dawng thei a; Rs. 1,96,550, Rs. 3,61,250, Rs. 4,04,500 leh Rs. 3,69,500 dawng mi pakhat ṭheuh an awm.

Phase-II hnuaia ṭanpuina dawngtu mi 15 zinga mi pathum chuan solid waste to energy an ti a, pakhatin urban transport a kalpui bawk. Chu'ng mi palite sum dawn zat pawh a inang lo hlawm a ni.