MYC leh kohhran pawl hrang hrang ṭhalaite Mizorama ṭhalaite pualin an ṭawngṭai

Mizoram Youth Commission (MYC) chair­man Joseph Lalhim­puia, MLA rawtna angin Mi­zorama kohhran pawl hrang hrang ṭhalai hruaitute chu June 9, Inrinni khan MYC pisa kawtah Zoram ṭhalaite pualin ṭawngṭaihona hun an hmang.

Ṭawngṭaihona hunah hian kohhran hrang hrang pakuaa ṭha­lai pawlte - KṬP (Presbyterian Koh­hran), ṬKP (Baptist), Salvation Army Youth, Diocese Catholic Ṭhalai (Roman Catholic) Penticostal Youth Department (PYD) North East India leh Mizoram, Adventist Youth Ministry (Seventhday Adventist), LIKBK Ṭhalai Pawl leh KrizyhpaThyutlia Py (Evangelical Church of Mizoram) hruaitute an tel.

Joseph Lalhimpuia chuan, khawvel thiamna chhuak thar zelin Mizo ṭhalaite a rûn mek laiin, ṭhalaite'n nun innghahna bulfûk, tum mumal tak neia khawvel ruala ke an pên ve theihna tura thawhhopuiah kohhran ṭhalaite a sáwm a ni.

MYC Chairman chuan, kohhran ṭhalai pawlte chu an inkhawmah vawi khat tal Zoram ṭhalai chhan chhuah ngaite leh ṭhalaite hma hruaitu tur zawng zawng tana ṭawngṭai rualna hun hmang turin a ngen a; kohhran ṭhalai pawl hruaitute chuan MYC Chairman ngenna chu tihhlawhtlin ngei an tum thu sawiin, Zoram ṭhalaite tan hmalakho zel ni se, an ti.

Kohhran ṭhalai hruaitute chuan, kohhranin daidanna bang ṭhiat zawnga MYC Chairman hmalakna chu fakawm an tih thu leh, ṭhalaite tana thawhhona tur remchang siam a ni ta chu Pathian remruat ni ngeia an hriat thu an sawi.

Ṭawngṭaina hun hman zawhah Joseph Lalhimpuia'n January 25, 2018-a MYC Chairman pisa a luah ṭan ní-ah an sawiho tawh angin, kohhran ṭhalai pawlte nen India ram hmun hrang hranga ṭhalaite tana hmun pawimawh tlawha zin (MYC Exposure Tour) dan tur sawiho nghal a ni.

MYC Exposure Tour 2018-a tel tur hian Central KṬP leh MṬKP

aṭangin aiawh pathum ve an tel ang a, SAY, PYD NEI leh Mizoram, Catho­lic Ṭhalai, Adventist Youth, LIKBK Ṭhalai Pawl, KTP (ECM) aṭangin mi pahnih ṭheuh tel tura ruahman a ni. August thla chawhma lamah tour hi kalpui turin an tinzâwn a ni.

Inkawmhonaah hian, Mizo ṭhalaite'n nun kawng dik an zawh theihna turin School Education department leh Higher & Technical Education department-te hnenah ngenna siam a, sikul zawng zawngah kumin chhungin ni khat tal moral education hun hman ni se, an ti bawk.