MNF-in fûrpui fehchhuah an chhunzawm

MNF party chuan, fûrpui fehchhuah an kalpui mekah June 9, Inrinni khan Sairang Bazarah vantlang inkhawm an buatsaih a, bialtu MLA K Sangṭhuama'n thu sawiin, Congress kaihhruai sorkar chu lei dawh leh kawng siamah an hlawhchham niin a sawi.

K Sangṭhuama chuan, Congress sorkar chhung ṭum ruk lei a chim tih sawiin, "Inkalpawhna kawngpui hrang hrangte a chhe hle a ni," a ti a; Congress sorkar chu kumina inthlanpui tin­zâwn râna kawng siamna atana budget tam tak dahah puhin, an kawng siamte erawh chu a chhe hle a, rei daih loin, tunah chuan a chhe leh tawh hle niin a sawi.

Aizawl West-I bial chhunga Ramrikawn, Sakawrtuichhun leh Lungverh inkar kawngpui km. 7-a thui, cheng vbc. 9 vel sênga siam chu zawh tlak loh khawpin hmun ṭhenkhatah a chhe leh tawh nia sawiin K Sangṭhuama chuan, "Hei hian Congress sorkarin kawng siam a ngaihthahzia a tilang a ni," a ti.

K Sangṭhuama chuan, tun hnaia Chief Minister-in a hawn Bairabi Tlawng lei chu Congress sorkar ṭan tirh kum 2008-a dawh ṭan, kum hnih chhunga dawh zawh tura tih a nih laiin, kum 10 chhung an dawh hnuah an hawng thei hrâm tih a sawi.

PWD minister Lal Thanzara'n Tuirini lei dawh laia a chim chu engineer-te mawh a nih loh thu a sawi leh, lei dawh enkawltu engineer chu hrem a hnêka kai­santir a ni chu mak a tih thu sawiin, "He thilah hian engineer-te'n mawh an phurh loh chuan amah PWD Minister tih loh chu mi dang mawhphurtu tur an awm lo a ni," a ti.

K Sangṭhuama chuan, Congress sorkar chu Education Policy nei loah puhin, chumi avang chuan transfer leh posting-ah nasa takin harsatna a thleng mek niin a sawi a; Health Care Scheme pawh Congress sorkarin an enkawl ṭha lo hle niin a sawi bawk.