State Referral Hospital tihchangtlun nan NEDP aṭangin cheng vbc. 43 pe tawh

Mizoram sorkar chuan medical college, Mizoram Institute of Medical Education & Research (MIMER) din a nih theihna tura State Referral Hospital tihchangtlun nan kum hnih chhungin NEDP aṭangin cheng vbc. 43 a pe tawh a, pek mai turin cheng vbc. 20 ruahman a ni bawk.

MIMER hotute tarlan danin, MIMER din a nih theih nan hian State Referral Hospital, Falkawn chu tihchangtlun a ngai a; tihchangtlunna atan hian Mizoram sorkar chuan NEDP aṭangin kum 2016-17 ah cheng vbc. 28 leh kum 2017-18 ah cheng vbc. 15 a pe tawh a, a vaiin cheng vbc. 43 a ni. Kum kal mek, 2018-19 ah hian Referral Hospital tihchangtlun nan NEDP-ah cheng vbc. 20 dah a ni.

NEDP aṭanga sum pek hmang hian hmanrua leh khawl ṭha tak tak eng emaw zat lei a ni tawh a, a ṭhen chu hman theiha peih ni tawh. Hmanrua leh khawl la lei tur a la awm nual a, chu'ng zingah chuan MRI khawl pawh a tel.

October 26, 2017-a Cabinet meeting-in MIMER atan post 629 siam a remtih tawh angin, MIMER-a thawk tur hian teaching faculty leh non-teaching staff tur eng emaw zat lak a ni tawh a; post 629-te hi kum nga chhungin a tahtawla lak tura ruahman a ni.

MIMER atana thawktu tur lak tura ruahman dan chu–faculty leh residents atan mi 168, administrative staff atan mi 40, technical staff atan mi 55, rural health training centre leh urban health training centre atan mi 10 ve ve, ancillary staff mi 95 leh nursing staff mi 251 a ni.

Medical college din turin a kum khatnaah Anatomy, Physiology leh Biochemistry subject-te a awm ngei a ngai a; subject pathuma faculty turte pawh lak a ni tawh. Anatomy-ah professor atan Dr Rijied Thompson Swer, associate srofessor atan Dr Dyutimony Dutta, assistant professor atan Dr Mary Hydrina D’Silva te lak an ni a; Physiology-ah associate professor turin Dr Naveen P lak niin, Biochemistry-ah professor atan Dr Haren Baruah leh associate professor atan Dr Nirensingh Koch te lak an ni bawk.

Tun dinhmunah faculty (professor, associate professor, assistant professor, demonstrator) leh residents (senior residents, junior residents) atan mi 74 lak a ni tawh a a, mahse, appointment pek tawh hnua zawm ta lo leh zawm hnua báng leh ta tlem azawng an awm.

Tun dinhmunah MIMER atana lak thar, hna zawm tawhte chu–professor pathum, associate professor pathum, assistant professor 29, demonstrator 14, senior resident pariat, junior resident 17, UDC pahnih, computer operator pathum, junior engineer pathum, laboratory technician 13, laboratory assistant pariat, receptionist pakhat, storekeeper pakua, CSSD technician pali, warden pahnih, rider pakhat, photographer pakhat, projectionist pakhat leh carpenter pakhat an ni.

Tarlan tawh angin, State Referral Hospital hi Medical Council of India (MCI) aiawhte'n ṭum thum an enfiah hnuah pawmpuiin, May 15, 2018-ah Ministry of Health & Family Welfare-ah Letter of Permission an thawn a; Ministry of Health & Family Welfare chuan May 25, 2018 khan medical college hawn phalna, Letter of Permission a pe ta a ni.