Ram leh hnam himna ngaihthahah ZPM-in Congress leh MNF an puh

Ṭangrual pawl, Zoram Peoles' Movement (ZPM) ṭhalaite chuan thuchhuah siamin, Congress leh MNF party-te chu ram leh hnam hmasawnna te, remna leh muannate leh hnam himnate ngaihthahah an puh.

ZPM ṭhalai chuan, Parliament-in Citizenship (Amendment) Bill, 2016 pass a tum chu ram leh hnam tan a him loh avangin India hmarchhak a state hrang hrangte'n an dodal a, MPC president Lalhmangaihsa Sailo leh ZNP president Lalduhoma te pawhin Bill chu pass lo tura ngenna memorandum a hran ve vein Joint Parliamentary Committee te, President leh Prime Minister hnenahte an thehlut tawh tih an sawi.

Chutih laiin, Congress party leh Mizoram sorkarin Citizenship (Amendment) Bill, 2016 chungchangah ngaihdan an puang mai duh lo nia sawiin ZPM ṭhalai chuan, "Tlai khaw hnuah, MLA inthlanpui lo awm tura mipui hriata ram leh hnam himna ngai pawimawh anga inlantir nan Law & Judicial department-in Bill sawihona a buatsaih hnuhnawh a ni. Sawihonaah Congress party-in party anga an la sawiho loh thu an sawi khan Mizoram sorkarin ram leh hnam himna an ngaihthahzia a tilang chiang hleah kan ngai," an ti.

ZPM ṭhalaite chuan, Law & Judicial bultuma Citizenship (Amendment) Bill, 2016 sawihonaa MNF party aiawh an tel lo chu MNF-in ram leh hnam himna an ngaih pawimawh lohzia tichiangtu niin an sawi bawk.