KHAWTHLIR

Tanpuina hlan
Bru Students Association sub-headquarters, Lawngtlai chuan an din champha vawi 27-na lawm nan June 9, Inrinni khan Lawngtlai District Hospital, Lairam Christian Medical Centre, Christian Hospital leh Lairam Motherless Home-a damlote hnenah thilpek an hlan. Bru Students Association hian an din champha lawm nan Inrinni khan intihhlimna hun an hmang bawk. BSA, Lawngtlai hnuaiah hian Bru zirlai 400 vel an awm a ni.

Thisen pe
June 9, Inrinni khan Bawngkawn Bial KṬP chuan blood donation camp an huaihawt a, mipa 28 leh hmeichhia pahnihte'n Synod Hospital tan unit 30 an pe. Lunglei Electric Veng Branch YMA pawhin Lunglei Civil Hospital tan thisen unit 19 an pe, a petute mipa 17 leh hmeichhia pahnih an ni.

Chaw nghei zel
Kum 2008 leh 2013-a Mizoram Pradesh Congress Committee nen thawhhona thuthlung tihhlawhtlin phût chaw nghei mek Mizoram Underground Returnees Association (MURA) member-te chuan chaw an la nghei chhunzawm zel. Chawnghei hi June 6, 2018-ah an ṭan a, tun thlengin sorkar thuneitute nen indawrna an la nei lo niin an sawi. MURA president PC Lalthuama chuan, a ṭul phawt chuan thih thlenga chaw nghei chhunzawm an tum thu a sawi bawk.

Synod Choir hlân
Kum 2018-20 chhunga Mizoram Synod Choir atana ruat tharte hlanna inkhawm June 8, Zirtawp ni zan khan Synod Conference Centre-ah neih a ni a, Synod moderator Rev. F Lalrinnunga’n Pathian hnenah ṭawngṭaiin a hlân. Inkhawm hi Central KṬP assistant leader Upa Rosangliana'n a kaihruai a, general secretary T.Upa Rochungnunga'n inhmelhriattirna hun a hmang. Synod Choir tharah hian conductor nen mi 25 an ni a, conductor chu T Laldintluanga, Ramhlun North a ni.

YMA-in kuang pe
YMA sub-headquarters, Serchhip chuan Inrinni khan Serchhip District Hospital (JN Hospital)-ah kuang panga an pe. Serchhip sub-hqrs. YMA hian an inkhawmpuiah Serchhip damdawi-inah a mamawh a piang hman turin kuang dah an rel a, an thurel bawhzuiin kuagn an siam a, puitling kuang pali leh naupang kuang pakhat an siam chu Serchhip District Hospital-ah an pe a ni.