CQF-a awmte ei manah sorkar a harsa Ei-in man sorkarin a tum lohna a awm nual

Mizoram sorkar chuan Mizoram pawn aṭanga tun hnaia rawn haw, community quarantine facility (CQF)-a awmte ei leh in senso turah harsatna a tâwk ṭan a, local task force-te chu an venga CQF-a awmte ei leh in senso tur ngaihtuah turin a beisei. Veng eng emaw zatah task force, kohhran leh pawl dangte'n ei leh in senso an tumsak a, khung hrante'n an tumna veng a awm nual bawk.

Sorkarin quarantine centre a siamah Mizoram páwn aṭanga rawn hawte chu an len vek dawn loh avangin Mizoram sorkar chuan kohhran hrang hrangte chu an hmunpuiah kohhran hmunhmate CQF atan hman a dil a, kohhrante pawhin an remti zui a ni.

CQF-a awmte ei leh in chungchangah DC-te'n task force-te hnenah lehkha an thawn a, chutah chuan CQF-a ei leh in chu kohhran emaw, khawtlang emaw, chhungkua emaw, mimal leh tlawmngai pawlte'n an tumsak a nih chuan thil lawmawm tak a nih tur thu a chuang a, "Amaherawhchu, LTF/VTF-te kaltlanga ruahmanna siam a ni ang. Ei leh in tumsaktu nei remchang lo an awm a nih chuan, LTF/VTF-te'n an bialtu Incident Commander/Zonal Officer hnenah hriattir tur a ni ang," tih a ni bawk.

Synod moderator Rev. R Lalchangliana chuan zawhna chhangin, sorkarin Mizoram Synod-a kohhran hmunhmate CQF atana hman a dilna lehkhaah khung hrante ei leh in chungchang sawi lan a awm loh thu a sawi.

Hetih lai hian, Aizawla veng lian tak pakhat LTF hruaitu chuan, an CQF-a awmte ei leh in tumsak thei lo chu sorkar (DC office)-a hriattir tura tih an nih thu a sawi a, "Lehkha kan dawnah chuan quarantine mekte ei leh in tur sorkarin a tumsak thei tawh lo tih inziak a awm lo a, mahse, DC nen ṭawngkaa kan inbiaknaah chuan tun dinhmunah chuan sorkarin sum a neih loh thu a sawi," a ti.

Community quarantine facility-a awmte ei leh in senso chungchangah hian Aizawla veng hrang hranga LTF-te tih dan a inang vek lo a; sorkarin a pe tura ngai an awm rualin, LTF-in a tumsak leh khung hran mek chhungkuate tumtir an awm.

Tualchhung kohhran ṭhenkhat chuan an veng CQF-a khung hrante ei leh in senso phuhrûkna tur sum an thawh a, KṬP branch zingah sum thawh tawh eng emaw zat an awm bawk.

Aizawl Chanmari LTF Secretary chuan, an venga quarantine centre-a awmte zawng zawng chu a tìr aṭangin an chaw ei tur an chhungte an tumtir thu a sawi a, "Kan veng chhungah kohhran hall leh YMA hall-ah mi 25 leh hotel-ah mi 14 an awm a, an vaiin an chhungte zing leh tlaiah chaw kan pektir ṭhin. Hetianga kan tih chhan chu sorkar chhâwk zângkhai nana kan tih a ni," a ti.

Durtlang LTF Secretary chuan, an venga CQF-ah mi 37 an awm mek tih sawiin, "An chhungte nen kan inráwn a, an inhuam angin an chhungte'n ei leh in an tum," a ti a; chutih rualin, quarantine centre-a awmte ei leh in senso sorkarin a tìr aṭanga a tum (ni khatah mi pakhatah Rs. 300) avangin an veng CQF-a awmte ei leh in senso tur pawh sorkar aṭangin an hmu tho tura an ngaih thu leh an hmu a nih chuan anmahni (khung hrante) an pek mai dawn thu a sawi.

Republic Vengah chuan sorkarin quarantine hun ni 21 a tih hma (ni 14 a tih lai) aṭang tawhin ni 21 quarantine turin an lo rél tawh a, a ṭul a nih chuan ni 14 aṭanga an awm belhna ni sarih chu khaw­tlangin a pek mai turin an rel. Chutih rual­in, ei leh in man chung­changah sorkar aṭangin thu dawn an nei lo a, tun thlengin ei man bill pawh sorkarah an la thehlut lo.

Hetih lai hian, Republic Veng LTF hruaitu pakhat chuan, quarantine-te chu swab sample endik a nih hma chuan chhuahtir lo tura tih an ni tih sawiin, "Ni 21 awm tling tawh mah se, swab test loh chuan chhuahtir loh tur a nih avangin, ni 21 aia tam pawh an awm thei a, an awm belh chhunga an eiin senso chu sorkarin a tum dawn nge dawn lo kan la hre lo," an ti.

Ramhlun North LTF Secretary sawi danin, an venga CQF-ah mi 55 an awm mek a; zawhna chhangin, sorkar aṭang­in ziak emaw, ṭawngka emawin sum harsat thu an dawng lo a, khung hran hun ni 21 chhunga an ei leh in senso chu sorkarin a tum turah an ngai a ni.

Maubawk West Kohhran chuan an hmunhma (CQF)-a awm mi 16-te chu an awm chhung zawng (ni 21) an ei leh in a tumsak a, sorkarin rate a siam angin, ni khatah mi pakhat tan Rs. 300 hisapin an tumsak.

Luangmual, Aizawlah chuan LTF-in an veng CQF-a awmte chu an theih chhung chu ei leh in senso tumsak an tum ve bawk.