DC-in Champhai leilet a enfiah

Champhai bawrhsap Maria CT Zuali chuan November 11, Nilaini khan Champhai leilet záwl tlawhin, buh leh thlai chìnna ni loa hmalakna awmte a enfiah. DC hi Agriculture department director (Crop Husbandry) Rohmingthanga Colney leh official-te'n an ṭawiawm.

Champhai DC chuan, phalna la hmasa loa leilet hmun thil danga hmangte chu square metre khat zelah Rs. 1,000 zel chawitir theih a nih thu leh dan hmanga hrem an nih theih thu a hrilh a; leilet hmun leh a hnaivaia land pass neite enfiah zel a nih tur thu leh a nihna tur ang ni loa hmangte chungah dan anga hmalak tum a nih thu a sawi.

Bawrhsap chuan, leivûng hmanga leilet chhilh a, thil danga hman tumna awm chu titàwp turin a hriattir a; sumdawnna bungraw dahna kudam atana hmante pawh enfiahin, leilet huam china in sa mek pakhat chu kut thlak chhunzawm tawh lo turin a hriattir bawk.

Sorkar thuchhuah tarlan danin, Mizorama leilet ṭhenkhat, buh leh thlai chìnna atan ni loa hman ṭhin chu sorkarin pawi a ti a, tihtawp dan tur kawng a zawng mek. Chumia hma la tur chuan Agriculture director (Crop Husbandry) Rohmingthanga Colney kaihhruai Task Force din a ni a, an thil hmuh leh zirchhuahte chu sorkarah an thlen dawn a ni.

Champhai leilet záwl, buh leh thlai chìnna atana hman chu agriculture land-a puana humhalh a nih theihna turin Agriculture department leh Land Revenue & Settlement department chuan an teh thar vek dawn. Leilet záwlte chu buh leh thlai chìnna atan bak thil danga hman a nih tawh lohna turin, 'The Mizoram Land Revenue Act, 2013' hmangin khauh taka humhalh tum a ni.